دوران احتجاج سیکیورٹی اہلکار کی ہلاکت کا الزام ، ماہ رنگ بلوچ کو عمرقید کی سزا

کوئٹہ: انسداد دہشتگردی عدالت (اے ٹی سی ) نے بلوچ یکجہتی کمیٹی (بی وائے سی) کی سربراہ ماہ رنگ بلوچ کو عمر قید کی سزا سنا دی۔

تفصیلات کے مطابق اے ٹی سی کوئٹہ نے ویڈیو لنک کے ذریعے ملزمان کو سماعت میں پیش کیا۔دوران سماعت عدالت نے ماہ رنگ بلوچ کے ساتھی رہنما صبغت اللہ کو بھی عمر قید کی سزا سنائی۔ دونوں ملزمان پر احتجاج کے دوران سیکیورٹی اہلکار کی ہلاکت کا الزام تھا۔

استغاثہ کے مطابق گوادر میں ہونے والے ایک احتجاج کے دوران سیکیورٹی اہلکار شبیر ایک مظاہرے کے دوران پتھر لگنے سے ہلاک ہوا تھا۔ جس کی ذمہ داری ریاست نے ماہ رنگ بلوچ اور ان کے ساتھیوں پر عائد کی۔

مقدمے کے دوران دونوں رہنماؤں کو باقاعدہ طور پر نامزد کیا گیا اور انہیں اس واقعے کا ذمہ دار قرار دیا گیا۔ مقدمہ مارچ 2025 میں پیش آنے والے جعفر ایکسپریس حملے کے بعد شروع ہونے والی کارروائیوں کے سلسلے سے جڑا ہوا ہے۔

دوسری جانب بلوچستان میں انسانی حقوق کی صورتحال، جبری گمشدگیوں اور ماورائے عدالت کارروائیوں کے الزامات کے حوالے سے بلوچ یکجہتی کمیٹی کی جانب سے طویل عرصے سے احتجاجی تحریک جاری ہے، جس کے دوران متعدد بار لانگ مارچ اور مظاہرے کیے گئے ہیں۔

خیا ل رہے کہ ماہ رنگ بلوچ پر یہ مقدمہ انسداد دہشت گردی ایکٹ کی مختلف دفعات کے تحت چلایا گیا، جبکہ عدالتوں میں ایسے مقدمات میں سیکیورٹی کے سخت انتظامات معمول کا حصہ ہوتے ہیں۔