زیارت میں دہشت گردوں کا خونریز حملہ ناکام، 9 پولیس اہلکار شہید، جوابی کارروائی میں 15 دہشت گرد ہلاک

کوئٹہ: بلوچستان کے سیاحتی ضلع زیارت میں دہشت گردوں نے پولیس چیک پوسٹ پر رات کی تاریکی میں بڑا حملہ کر دیا، جس کے نتیجے میں دو تھانہ انچارجوں سمیت 9 پولیس اہلکار جامِ شہادت نوش کر گئے۔

حملے کے بعد سیکیورٹی فورسز، بلوچستان پولیس اور دیگر قانون نافذ کرنے والے اداروں نے مشترکہ کلیئرنس آپریشن کرتے ہوئے 15 دہشت گردوں کو ہلاک کر دیا جبکہ اغوا کیے گئے تمام 8 پولیس اہلکاروں کو بحفاظت بازیاب کرا لیا گیا۔

زیارت کے ضلعی پولیس افسر عبدالقدوس دہوار کے مطابق دہشت گردوں نے ضلع زیارت کے علاقے کچ مانگی فیز تھری میں قائم پولیس چیک پوسٹ پر بھاری ہتھیاروں سے حملہ کیا۔ حملہ آوروں اور پولیس کے درمیان رات بھر شدید فائرنگ کا تبادلہ جاری رہا، جس میں پولیس اہلکاروں نے آخری دم تک بہادری سے مقابلہ کیا۔ شہداء میں تھانہ مانگی کے انچارج محمد حسین اور تھانہ کواس کے انچارج صحبت خان بھی شامل ہیں، جبکہ دیگر سات اہلکار بھی فرض کی ادائیگی کے دوران شہید ہوئے۔

حملے کے فوراً بعد بلوچستان پولیس، فرنٹیئر کور، سیکیورٹی فورسز اور دیگر اداروں نے علاقے کا محاصرہ کر کے مشترکہ کلیئرنس آپریشن شروع کیا۔ کئی گھنٹوں تک جاری رہنے والی کارروائی میں 15 دہشت گرد مارے گئے جبکہ حملہ آوروں کے قبضے سے اغوا کیے گئے 8 پولیس اہلکاروں کو بحفاظت بازیاب کرا لیا گیا۔ حکام کے مطابق علاقے میں سرچ آپریشن بدستور جاری ہے تاکہ فرار ہونے والے دہشت گردوں کو گرفتار کیا جا سکے۔

پولیس حکام کے مطابق تمام شہداء کی میتیں قانونی کارروائی اور پوسٹ مارٹم کے لیے ضلعی ہیڈکوارٹر اسپتال زیارت منتقل کر دی گئی ہیں، جبکہ بعد ازاں انہیں سرکاری اعزاز کے ساتھ ان کے آبائی علاقوں میں سپردِ خاک کیا جائے گا۔ واقعے کے بعد زیارت اور ملحقہ علاقوں میں سیکیورٹی ہائی الرٹ کر دی گئی ہے اور اضافی نفری تعینات کر دی گئی ہے۔

ابتدائی تحقیقات کے مطابق حملہ آوروں کا تعلق فتنہ الخوارج سے بتایا جا رہا ہے، جو ریاستی مؤقف کے مطابق کالعدم تحریک طالبان پاکستان سے وابستہ دہشت گرد عناصر ہیں، تاہم حکام کا کہنا ہے کہ واقعے کی مکمل تحقیقات جاری ہیں اور ذمہ دار عناصر کی حتمی شناخت تفتیش مکمل ہونے کے بعد سامنے لائی جائے گی۔

وزیراعظم شہباز شریف نے حملے کی شدید مذمت کرتے ہوئے شہداء کو خراجِ عقیدت پیش کیا اور کہا کہ دہشت گرد پاکستان کے امن کو نقصان نہیں پہنچا سکتے۔ انہوں نے شہداء کے اہل خانہ سے اظہارِ تعزیت کرتے ہوئے یقین دلایا کہ دہشت گردی کے مکمل خاتمے تک کارروائیاں جاری رہیں گی۔

وفاقی وزیر داخلہ محسن نقوی نے کہا کہ پولیس اہلکاروں کی قربانیاں پوری قوم کے لیے باعثِ فخر ہیں۔ ان کا کہنا تھا کہ دشمن کے ناپاک عزائم کو ہر قیمت پر ناکام بنایا جائے گا اور دہشت گردوں اور ان کے سہولت کاروں کے خلاف بلاامتیاز کارروائی جاری رہے گی۔ انہوں نے اس حملے کا الزام بھارت کی سرپرستی میں کام کرنے والے دہشت گرد عناصر پر بھی عائد کیا۔

زیارت میں فتنہ الخوارج کے خلاف کامیاب کلیئرنس آپریشن پر بلوچستان پولیس، سیکیورٹی فورسز اور قانون نافذ کرنے والے تمام اداروں کو خراجِ تحسین پیش کرتا ہوں۔ بلوچستان پولیس کے ان شہداء کو سلام پیش کرتا ہوں جنہوں نے آپریشن کے دوران جام شہادت نوش کیا شہداء کی قربانیاں ہرگز رائیگاں نہیں…

— Sarfraz Bugti (@PakSarfrazbugti) July 7, 2026

وزیراعلیٰ بلوچستان سرفراز بگٹی نے کہا کہ ریاست کی رٹ ہر صورت قائم رہے گی اور کوئی دہشت گرد گروہ بلوچستان کے امن کو یرغمال نہیں بنا سکتا۔ انہوں نے شہداء کے اہل خانہ کے لیے ہر ممکن تعاون اور زخمی اہلکاروں کو بہترین طبی سہولیات فراہم کرنے کی ہدایت دیتے ہوئے کہا کہ دہشت گردوں کے خلاف انٹیلی جنس بنیادوں پر آپریشن مزید تیز کیے جائیں گے۔

حکام کے مطابق علاقے میں سرچ اور کلیئرنس آپریشن جاری ہے جبکہ سیکیورٹی ادارے حملے میں ملوث دہشت گردوں کے سہولت کاروں کی تلاش میں بھی کارروائیاں کر رہے ہیں۔ حکومت کا کہنا ہے کہ بلوچستان میں امن خراب کرنے کی ہر سازش کو ناکام بنایا جائے گا اور شہداء کا خون رائیگاں نہیں جائے گا۔