پی ٹی آئی حکومت سے مذاکرات کیلئے تیارہو گئی، راجا ناصر عباس

پاکستان تحریک انصاف حکومت سے مذاکرات کے لیے تیار ہوگئی اور اس نے وزیراعظم شہباز شریف سے سیاسی رہنماؤں کی کمیٹی بنانے کا مطالبہ کر دیا۔

سینیٹ میں اپوزيشن لیڈر راجا ناصر عباس نے میڈیا سے گفتگو کرتے ہوئے کہا کہ دونوں جانب سے سیاسی کمیٹیاں بیٹھیں تو معاملات کاحل نکل سکتا ہے، حکومت آج یا جب بیٹھنا چاہے ہماری جانب سے مذاکرات کے دروازے کھلے ہیں۔

علامہ ناصر عباس کا کہنا تھا کہ ملک کو بحران سے نکالنے کیلئے بامعنی مذاکرات ہونے چاہئیں ، وزیراعظم ٹیم بنائیں سیاسی لوگ بیٹھیں اور ان مسائل کا حل نکالیں، بااختیار اور فیصلہ کرنے والے لوگ بیٹھیں تو مسائل کا حل نکل سکتا ہے۔

چیئرمین پی ٹی آئی بیرسٹر گوہر نے بھی میڈیا سے گفتگو کرتے ہوئے دعویٰ کیا ہے کہ گزشتہ رات سے وفاقی سطح پر متعلقہ لوگوں سے رابطے جاری ہیں ، رابطوں میں گزشتہ واقعات سے متعلق اپنا پیغام پہنچادیا ہے۔

چیئرمین پی ٹی آئی بیرسٹر گوہر نے متعلقہ لوگوں سے مطالبہ کیا کہ اس طرح اقدامات سے گریز کیا جائے،گرفتاریاں صورتحال کو مزید سنگین بنا دیں گی،،اب وقت ہے کہ صورتحال کو مزید بگڑنے سے روکا جائے۔

ان کا کہنا تھا کہ ہم اسلام آباد پر چڑھائی کرنے نہیں جارہے، پارلیمنٹ سینیٹ اور ہر جگہ آواز اٹھائی کوئی سُنتا نہیں ،سیاسی چیمپئن ہمیں بتائیں کہ ہم احتجاج کے سوا کیا کریں۔