کورونا کےبڑھتےکیسز : پنجاب کے منتخب اضلاع میں لاک ڈاؤن میں 15 ستمبر تک توسیع

تفصیلات کے مطابق سیکرٹری پرائمری اینڈ سکینڈری ہیلتھ کیئر عمران سکندر بلوچ نے لاک ڈاؤن آرڈرکانوٹیفکیشن جاری کردیا۔ان اضلاع میں لاہور، راولپنڈی، فیصل آباد، ملتان، خانیوال، میانوالی، سرگودھا، خوشاب، بہاولپور، گوجرانوالہ اور رحیم یار خان شامل ہیں۔ سیکرٹری عمران سکندربلوچ  کے مطابق  منتخب 11 اضلاع میں یہ آرڈر27 اگست سے15ستمبرتک نافذالعمل رہےگا۔ کورونا کےباعث ان اضلاع میں مجوزہ لاک ڈاؤن کی شقوں پرسختی سےعمل درآمدکروایاجائیگا۔ عام مارکیٹس رات 8بجےتک کھلی رہ سکیں گی جبکہ ہفتہ اوراتوار کوتمام مارکیٹس بندرہیں گی۔

سیکرٹری پرائمری اینڈ سکینڈری ہیلتھ کیئرکے مطابق ان ڈورشادی کی تقریبات پرمکمل پابندی عائدہو گی، آوٹ ڈورشادی کی تقریبات میں صرف300 افرادکےآنےکی اجازت ہوگی،تمام قسم کی مذہبی   اوردیگرتقریبات کوانڈورمنعقد کرنےپرپابندی ہوگی،ترمیم کے مطابق آؤٹ ڈورتقریبات میں صرف 300افرادکےآنےکی اجازت ہوگی جبکہ ان ڈورڈائننگ پر مکمل پابندی ہو گی۔ریسٹورنٹس صرف آؤٹ ڈور ڈائننگ کے ساتھ رات 10بجے تک  کھل سکیں گے۔جم صرف ویکسی نیٹڈ افرادکو ورزش کی اجازت دیں گے،تمام سرکاری و نجی دفاتر میں عام آفس ٹائمنگ پرعمل ہوگا۔سرکاری و نجی دفاتر میں 50 فیصد عملہ کی موجودگی کی اجازت ہو گی،پبلک ٹرانسپورٹ میں مسافروں کی کپیسٹی کو 70 سے 50 فیصد کر دیا گیا ۔سفر کے دوران کھانے پینے کی اشیاء فروخت کرنے کی اجازت نہیں ہو گی،ریلویز میں کل استعداد کےصرف 70 فیصد مسافر سفر کر سکیں گے۔

تمام تفریحی مقامات ، واٹر سپورٹس اور سوئمنگ پولز پر پابندی ہو گی ، صرف ویکسینیٹڈ سیاحوں کو سفر کرنے کی اجازت ہو گی،سیکرٹری پرائمری اینڈ سکینڈری ہیلتھ کیئر کے مطابق زراعت اور انڈسٹری سے متعلقہ کاروبار کھل سکیں گے، باقی اضلاع پر30 جون کے لاک ڈاؤن آرڈرزکااطلاق ہوگا۔ سیکرٹری عمران سکندر بلوچ کاکہنا ہے کہ ضلعی انتظامیہ اور پولیس مل کر ان ایس اوپیزکااطلاق یقینی بنائیں گے، تمام شہری ماسک کی پوری طرح پابندی کریں گے ، تمام سنٹرزپر  ویکسین وافر مقدار میں موجود ہے ۔