وسیم اکرم کی10 ماہ بعد اہلیہ اور بیٹی سے ملاقات ، جذباتی ویڈیو شئیر کردی

تفصیلات کے مطابق سماجی رابطے کی ویب سائٹ ٹوئٹر پر سابق کرکٹراور سوئنگ کے سلطان  وسیم اکرم نے ایک پیغام میں اپنی اہلیہ اور بیٹی سے ملاقات کی  خوبصورت ویڈیو شیئر کی ہے۔ ویڈیو میں  دیکھا جاسکتا ہے کہ وسیم اکرم کی بیٹی عائلہ بھاگتے ہوئے گھر کا دروازہ کھولتی ہیں تو سامنے اُن کے والد وسیم اکرم کھڑے ہوتے ہیں۔ جسے دیکھ کروہ  فوراََ اُن کے گلے لگ جاتی ہیں اور وسیم اکرم کہتے ہیں کہ میں نے آپ کو بہت زیادہ یاد کیا۔ وسیم اکرم  نے ویڈیو کے عنوان میں لکھا کہ آخرکار! میں نے 10 ماہ کے بعد اپنی بیٹی کو دیکھ لیا۔ اُنہوں نے  اہلیہ شنیرا کا اتنے ماہ بیٹی عائلہ کو اکیلے سنبھالنے پر شکریہ بھی ادا کیا۔

Finally seeing my daughter after 10 months apart! Thank you @iamshaniera for raising such a beautiful little princess while we have been apart #HappyDays #Australia pic.twitter.com/EbyCTOKzZp

— Wasim Akram (@wasimakramlive) September 4, 2021

خیال رہے کہ سابق قومی کرکٹر وسیم اکرم اہلیہ شنیرا اکرم اور بیٹی عائلہ سے طویل مدت بعد ملنے کے لیے گزشتہ دنوں ہی میلبورن پہنچے تھے ۔ گزشتہ برس سے شنیرا بیٹی کے ہمراہ کورونا وبا کی سفری پابندیوں کے باعث آسٹریلیا میں ہی پھنسی ہوئی تھیں۔ 

واضح رہے کہ لیجنڈ کرکٹر وسیم اکرم نے سال 2013ء میں آسٹریلوی نژاد خاتون شنیرا سے شادی کی تھی جن سے ان کی ایک بیٹی عائلہ ہے، عائلہ کی پیدائش 2014ء میں ہوئی تھی۔