کارکن تیاری کریں،آنے والی حکومت پیپلزپارٹی کی ہو گی:بلاول بھٹو

تفصیلات کے مطابق ڈیرہ غازی خان میں جلسہ سے خطاب کرتے ہوئے چیئرمین پی پی بلاول بھٹو نے کہا کہ ملک کا ہر شہری اس وقت تکلیف میں ہے سب پریشان ہیں کہ یہ کون سے نیا پاکستان ہے جہاں تاریخی مہنگائی، غربت اور بیروزگاری ہے۔

انہوں نے کہا کہ قائد عوام کے دور میں کسان کو زمین کا مالک بنا دیا گیا تھا اور لوگوں کو روزگار ملتا تھا لیکن اب ہم پر نیا پاکستان مسلط کیا گیا ہے پیپلزپارٹی کے دور میں کسان خوشحال تھا، ملکی معیشت ترقی کررہی تھی اور ہم نے گندم برآمد کرنا شروع کردی تھی۔

بلاول بھٹو نے کہا کہ پیپلزپارٹی کے جانے کے بعد عوام لاوارث ہوگئے ہیں اور کوئی عوام کے لیے بولتا بھی نہیں ہے۔ انہوں نے کہا کہ مجھے جدوجہد میں عوام کی مدد کی ضرورت ہے،اس علاقے سے ہمارا تین نسل پرانا رشتہ ہے۔

 بلاول بھٹو نے کہا کہ عوام کے حقوق سلب کیے جا رہے ہیں اور عمران خان عوام سے روزگار، روٹی، کپڑا اور مکان بھی چھین رہے ہیں ،امیروں کو سپورٹ کرنے سے معیشت کو فائدہ نہیں ہوتا ہے لیکن عام آدمی کو سپورٹ کرنے سے معیشت ترقی کرتی ہے۔

ان کا مزید کہنا تھا کہ ہم عمران خان کو معاف نہیں کریں گے، ان سے حساب لیں گےعمران خان نے عوام کے ووٹ، جیب اور پیٹ پر ڈاکہ مارا ہے۔