مختلف ٹریفک حادثات میں چار افراد جاں بحق ،متعددزخمی

تفصیلات کے مطابق شاہ کوٹ ، صفدر آباد روڈ چک 82 کے قریب تیز رفتار کار موٹرسائیکل سے ٹکرا گئی جس کے نتیجے میں ایک شخص جاں بحق جبکہ دو شدید زخمی ہوگئے،  زخمیوں میں سےایک کی حالت تشویشناک ہے دونوں کو  الائیڈ اسپتال فیصل آباد منتقل کردیا گیا ۔

ایک اور حادثے میں بہاولپور روڈ  حاصل پور میں اسکول وین اور ٹرک کے درمیان تصادم کے نتیجے میں ایک طالب علم جاں بحق جبکہ دیگر8 زخمی ہوگئے۔ اطلاع ملنے پر ریسکیو ٹیمیں موقع پر پہنچ گئیں اور جاں بحق اور زخمیوں کو قریبی اسپتال منتقل کردیا۔ اطلاعات کے مطابق حادثہ دھند کے باعث پیش آیا۔

کراچی کے علاقے شیرشاہ میں آئل کمپنی کے قریب تیزرفتار ڈمپرموٹرسائیکل پر چڑھ گیا  جس  کے نتیجہ میں موٹرسائیکل پر سوار میاں ، بیوی جان کی بازی ہارگئے جبکہ ان کے دوبچے زخمی ہوگئے۔ پولیس کے مطابق لاشوں  اور زخمی بچوں کو سول اسپتال منتقل کردیا گیا ہے۔ پولیس نے ڈمپر ڈرائیور کو حراست میں لے کر ڈمپر تحویل میں لے لیا۔

عالمی ادارہ صحت کے مطابق پاکستان میں سالانہ 35 ہزار لوگ سڑک حادثات  میں جاں بحق ہوجاتے ہیں، جبکہ 50 ہزار سے زائد افراد زخمی اور عمر بھر کی معذوری سے دوچار ہوتے ہیں۔ حکومتی رپورٹ کے مطابق پاکستان میں ہر پانچ منٹ کے بعد ٹریفک حادثہ پیش آتا ہے، جس میں کوئی نہ کوئی شخص زخمی یا جاں بحق ہوجاتا ہے۔