وزیراعظم نے سینیٹ الیکشن میں فتح کیلئے جہانگیر ترین سے مدد مانگ لی

جی این این کے مطابق سینیٹ الیکشن میں حکومت کی کشتی کو بھنور سے نکالنے کے لیے وزیر اعظم عمران خان نے پارٹی کے اہم رہنما جہانگیر ترین سے ٹیلیفونک رابطہ کیا ، اور جہانگیر ترین کو سینیٹ الیکشن میں کردار ادا کرنے کی ہدایت کی ۔ ذرائع کے مطابق جہانگیر ترین نے وزیراعظم سے شکوہ بھی کیا اور مدد کی یقین دہانی بھی کرائی ۔ 

ذرائع نے بتایا کہ اس مشن کے لیے جہانگیر ترین نے جنوبی پنجاب کے ناراض ایم پی ایز سے ملاقاتیں کیں ، انہوںنے رحیم یار خان، ساہیوال، فیصل آباد اور لودھراں  کے دوروں میں ارکان اسمبلی سے ملاقاتیں کیں۔ جبکہ ملتان، لودھراں، مظفر گڑھ، ڈیرہ غازی خان کے ارکان قومی و صوبائی اسمبلی جہانگیر ترین کے ساتھ رابطے میں ہیں۔ اس دوران پنجاب حکومت سے نالاں ارکان نے جہانگیر ترین کو تعاون کی یقین دہانی کروائی۔ 

ا س سے قبل وفاقی وزیر خزانہ حفیظ شیخ نے بھی سینیٹ انتخابات میں فتح کے لیے جہانگیر ترین سے تعاون مانگا۔ وزیر خزانہ حفیظ شیخ سینیٹ انتخابات میں اسلام آباد سےپاکستان تحریک انصاف کے  امیدوار ہیں۔ تاہم حفیظ شیخ نے تحریک انصاف کے مرکزی رہنما جہانگیر ترین سے رابطہ کیا ہے ۔ جس پر جہانگیر ترین نے کہا ہے کہ آپ دوست ہیں ، آپ کیساتھ مکمل تعاون کروں گا۔انہوں نے کہا کہ ہماری پارٹی کے امیدوار ہیں ، آپ ہی کو سپورٹ کروں گا،  جلد اسلام آباد میں آپ سے ملاقات ہو گی۔

واضح رہے کہ ملک بھرمیں سینیٹ انتخابات 3 مارچ کو ہوں گے ، الیکشن کمیشن نے سینیٹ انتخابات کا شیڈول جاری کر دیا۔ الیکشن کمیشن 48 نشستوں پر انتخابات کرائے گا جن میں  اسلام آباد کی2 ، پنجاب کی 11 ، سندھ  11 ، خیبر پختونخواہ سے 12 اور بلوچستان کی 12 نشستیں شامل  ہیں ۔ الیکشن کمیشن کے مطابق چاروں صوبائی اسمبلیاں اور پارلیمنٹ ہاؤس کو پولنگ سٹیشن کا درجہ حاصل ہوگا۔