اداکارہ نادیہ خان کے ساتھ فراڈ کرنیوالا ملزم گرفتار 

تفصیلات کے مطابق ایف آئی اے سائبر سیل  نے کارروائی کرتے ہوئے پاکستان کی معروف میزبان ، اداکارہ نادیہ خان سے جعلسازی کرنے والے ملزم کے خلاف مقدمہ درج کر لیا ہے۔ ایڈیشنل ڈائریکٹر ایف آئی اے سائبر کرائم کے مطابق  نادیہ خان یوٹیوب پر اپنا پیج چلاتی تھیں اور  ستمبر 2020 میں نادیہ خان کا یوٹیوب پیج    ہیک ہوگیا تھا، جس کی   ریکوری کے لیے نادیہ خان نے  ایک آئی ٹی پروفیشنل سے رابطہ کیا تاہم  آئی ٹی ایکسپرٹ نے یو ٹیوب چینل ہیک کرنے کے بعد گوگل پبلشر آئی ٹی اور بینک کی تفصیلات تبدیل کر دیں ۔ نادیہ خان کو فراڈ کا پتہ چلا تو انہوں نے ایف آئی اے سائبر کرائم کو شکایت کی۔

 ایف آئی اے حکام کے مطابق اس صورتِ حال کے بعد نادیہ خان کے یوٹیوب چینل کی تمام کمائی آئی ٹی ایکسپرٹ کو جانے لگی تھی۔ حکام کا کہنا ہے کہ نادیہ خان کو  مدد کے نام پر آئی ٹی ایکسپرٹ نے  لاکھوں کا مالی  نقصان پہنچایا۔  ایف آئی اے نے ملزم حماد سمیع کو گرفتار کر کے اس کے خلاف مقدمہ درج کر لیا ہے ۔ 

واضح رہے کہ نادیہ خان پاکستان کی مقبول ترین میزبان ہیں اور اُس کے علاوہ اُنہوں نے  مختلف ٹی وی چینلز پر بھی متعدد ڈراموں میں اداکاری کی ہے۔