وزیر خارجہ شاہ محمود قریشی کی سیکرٹری جنرل اقوام متحدہ انتونیو گوتریس سے ملاقات 

تفصیلات کے مطابق وزیر خارجہ نے ملاقات میں اقوام متحدہ کے سیکرٹری جنرل کو مقبوضہ کشمیر کے تازہ ترین صورت حال سے آگاہ کیا اور بتایا کہ بھارت نے وہاں پر غیر قانونی طریقہ سے بیالیس لاکھ جعلی ڈومیسائل غیر ریاستی باشندوں کو دیئے ہیں تاکہ آبادی کا تناسب تبدیل کیا جا سکے۔ 

اس موقع پر انہوں نے مقبوضہ کشمیر میں 9 لاکھ بھارتی فوج کی طرف سے بڑھتے ہوئے مظالم سے بھی آگاہ کیا اوراس موقع پر وزیر خارجہ نے انتونیو گوتریس کو کشمیر کی صورتحال کے حوالے سے ڈوزیئر پیش کیا۔ 

شاہ محمود قریشی نے کہا ہے کہ اب جبکہ افغانستان میں ایک نئی صورت حال ہے تو اس تناظر میں خطہ میں امن قائم رکھنے کے لیے اقوام متحدہ مسئلہ کشمیر کے حل کے لئے اپنا موثر کردار ادا کرے۔

شاہ محمود قریشی نے کہا کہ امریکی وزیر خارجہ نے افغان انخلا کے عمل میں پاکستان کے کردار کو سراہا ہے، مستحکم افغانستان کے لیے سب کو مل بیٹھنا ہوگا، افغانستان میں مخلوط حکومت پاکستان کی بھی خواہش ہے، اگر بہتر حکمت عملی نہ اپنائی تو افغانستان کے حالات بگڑ بھی سکتے ہیں۔