سرچ انجن گوگل  کی آج 23 ویں سالگرہ

ہر سوال کا  لمحوں میں جواب دینا والا گوگل  آج 23 سال کا ہو گیا ہے لیکن انٹرنیٹ سرچ انجن کی مقبولیت میں کمی نہیں آ سکی ہے۔ سالگرہ کے موقع پر گوگل کا خصوصی ڈوڈل جاری کیا گیا جس میں مختلف سالوں میں صارفین کی جانب سے کی جانے والی ٹاپ سرچز کو دہرایا گیا ۔

گوگل  کی بنیاد  لیری پیج اور سرگئے برن نے رکھی تھی اور آج گوگل ایپل کے بعد دنیا کی سب سے امیر ترین کمپنی ہے۔  گوگل کا قیام 1998 میں عمل میں آیا تھا  جب اسٹین فورڈ یونی ورسٹی کے   دو طالب علموں نے اپنی ریسرچ پروجیکٹ کے طور پر متعارف کرایا تھا تاہم وقت گزرنے کے ساتھ ساتھ یہ ایک گلوبل ٹیک انجن کی حیثیت اختیار کر گیا اور اب یہ 190 سے زائد ممالک میں 150 سے زائد زبانوں میں معلومات فراہم کررہا ہے۔

دلچسپ بات یہ ہے کہ دوسروں کو معلومات دینے والا گوگل خود اپنی سالگرہ سے واقف نہیں ۔ 2006سے اس نے اپنی سالگرہ27 ستمبر کو منانا شروع کی تاہم اس سے قبل گوگل اپنی سالگرہ 26 ستمبر کو منارہا تھا۔ گوگل نے اپنی چھٹی سالگرہ 7 ستمبر کو منائی تھی اور اس سے پہلے یہ سالگرہ 8 ستمبر کو منائی گئی تھی۔

گوگل نے 2013 میں تسلیم کیا کہ اس نے چار مختلف تاریخوں پر سالگرہ منائی ہے تاہم اب یہ سالگرہ کئی سالوں سے 27 ستمبر کو ہی منائی جارہی ہے اور یہ وہ دن ہے جب گوگل نے 2002 میں پہلی بار اپنی سالگرہ کے لیے ڈوڈل کا استعمال کیا تھا۔