سب کی سوچ مختلف ہے پارٹی اختلافات ہوسکتے ہیں:مریم نواز

تفصیلات کے مطابق مسلم لیگ ن کی رہنما مریم نواز کا کہنا ہے کہ میری اور حمزہ کی سوچ مختلف ہو سکتی ہے، طریقہ کار بھی مختلف ہو سکتا ہے، سب کا اس بات پر اتفاق ہے کہ گھر اور پارٹی کے سربراہ نواز شریف ہیں۔

مریم نوازکا کہنا تھا کہ شہباز شریف کی پارٹی کے لیے خدمات کی معترف ہوں جبکہ میں  حمزہ کیلئے دل سے دعا گو ہوں ۔

یاد رہے کہ گزشتہ دنوں مریم نواز نے بیان دیا تھا کہ آرمی چیف کو ایکسٹینشن دینے کے معاملے میں وہ شریک نہیں تھیں بلکہ انہوں کہا تھا کہ جس پارٹی نے آرمی چیف کو ایکسٹینشن دی تھی میں اس کا حصہ نہیں ہوں۔

پنجاب اسمبلی میں اپوزیشن لیڈر حمزہ شہباز نے گزشتہ دنوں مریم نواز کے بیان کی مخالفت کرتے ہوئے کہا تھا کہ آرمی چیف کو ایکسٹینشن دینا درست فیصلہ تھا، ووٹ دینے کا فیصلہ ن لیگ کی قیادت کا تھاانہوں نے کہا کہ ایسے معاملات پر قومی مفاد کو ذاتی مفاد سے اوپر رکھنا چاہیے۔

خیال رہے کہ گزشتہ روز مسلم لیگ ن کے رہنما خواجہ آصف نے کہا تھا کہ جھگڑے ورکروں کے نہیں قیادت کے ہیں، جھگڑے اور دراڑیں ختم ہونی چاہیں،اتحادقائم ہونا چاہیے،یہ اتحاد قائم کرنے کا وقت ہے، آئندہ انتخابات میں کامیابی کے لیے اتحاد قائم کرناہوگا۔