اس کو حکومت مل گئی لیکن عزت نہیں ملی: مریم نواز

تفصیلات کے مطابق پارٹی اجلاس سے خطاب کرتے ہوئے مریم نواز کا کہنا تھا کہ اگر ہم بیانیہ اور خدمت کو ملادیں تو مسلم لیگ(ن) جیسی کوئی اور جماعت نہیں، پاکستان کا ماضی،حال اور مستقبل مسلم لیگ(ن) ہی ہے۔

ان کا کہنا تھا کہ ایک پیج پر ہونے کے باوجود انکا ایک ہی وعدہ پوراہوا میں قوم کو رولاؤں گا،ایسی حکومت بنادی ہے جو قوم کے اور ان کے ساتھ نہیں ،ہماری قومی ذمہ داری ہے کہ اس ملک کو غلط ہاتھوں میں نہ جانے دیں۔

انہوں نے کہا ہے کہ قدرت کا اصول ہے وقت ایک جیسا نہیں رہتا اور ہم وقت بدلتا دیکھ رہے ہیں،اس حکومت کا زوال قریب  ہے، الیکشن کمیشن پر حملے اس لیے کررہے ہیں کہ ان کے پول کھلنے کا ڈر ہے،میڈیا کو بند کیا جاتا ہے مخالفین کو دبایا جاتا ہے۔

مسلم لیگ(ن) کی نائب صدر کا کہنا تھا کہ کنٹورنمنٹ بورڈ کے الیکشن میں ڈکٹیٹر شپ کے دور سے زیادہ  اوچھے حربے استعمال ہوئے، لیکن الحمد اللہ ہمیں بڑی کامیابی ملی،کشمیر کے الیکشن میں ہم ٹی وی پر ہرادیے گئے تھے۔ 

مریم نواز کا کہنا تھا کہ حکمران جماعت نے چھ لاکھ اور ہم نے پانچ لاکھ ووٹ لیا،ہمارے مخالفین الیکشن جیتنے کے بعد بھی سر جوڑ کر بیٹھے گئے ان کو فتح نہیں شکست لگی۔ 

ان کا مزید کہنا تھا کہ ہم نے 2018کے الیکشن میں ساہیوال میں صرف ایک  نشست ہاری، میں آج بھی آپ کے چہرے پر جیت اور کمٹمنٹ کا جذبہ اور چمک دیکھ رہی ہوں، یہ چمک صرف ان چہروں پر رہتی ہے جو اپنی قیادت سے وابستہ  ہیں اور اپنے نصب العین سے پیچھے نہیں ہٹتے۔