وزیراعظم عمران خان سے وفاقی وزیر صنعت و پیداوار مخدوم خسرو بختیار کی ملاقات

تفصیلات کے مطابق وزیراعظم کا کہنا تھا کہ حکومت روزگار کی فراہمی کیلئے چھوٹے اور درمیانے پیمانے کی صنعت کو سہولیات کی فراہمی یقینی بنا رہی ہے۔

ان کا کہنا تھا کہ حکومت کی مثبت پالیسیوں کی بدولت کرونا کے باوجود بڑے پیمانے کی صنعت میں خاطر خواہ ترقی خوش آئند ہے،صنعتوں کی اپنی پوری استعداد پر چلنے سے ملک میں روزگار کے مواقع پیداہورہے ہیں۔ 

ملاقات میں وزیر اعظم کو ملکی صنعتی ترقی کیلئے حکومت کے اقدامات پر بریفنگ دی گئی ہے اسکے علاوہ کراچی میں 1500 ایکڑ پر محیط صنعتی زون کی تعمیر پر پیش رفت اور ایس ایم ای پالیسی کے بارے میں بھی بریفنگ دی گئی ہے ۔

دوسری جانب وزیرِ اعظم عمران خان سے وزیراعظم آزاد جموں و کشمیر سردار عبدالقیوم نیازی نے بھی ملاقات کی ہے۔

ملاقات میں آزاد کشمیر ترقیاتی پیکیج اور پانچ سالہ ترقیاتی پلان پر گفتگوکی گئی ہے،ترقیاتی پیکیج میں سیاحتی انفراسٹرکچر، بنیادی صحت و تعلیم اورایل او سی کے قریب مقیم آبادی کیلئے منصوبے شامل ہیں۔

وزیرِ اعظم عمران خان کا کہنا تھا کہ حکومت آزاد کشمیر میں سیاحت کے فروغ کیلئے انفراسٹرکچر کی بہتری کے اقدامات اٹھا رہی ہے ،وادی میں سیاحت کے فروغ سے معاشی ترقی اور روزگار کے مواقع پیدا ہونگے ۔

وزیر اعظم عمران خان کا مزید کہنا تھا کہ آزاد کشمیر کے لوگوں کی صحت اورتعلیم کی سہولیات کی فراہمی یقینی بنانے کیلئے اقدامات اٹھائے جا رہے ہیں۔