یو اے ای کا بڑا اعلان ، 5 سال کے ملٹی پل انٹری سیاحتی ویزے کا آغاز 

تفصیلات کے مطابق  اماراتی امیگریشن حکام کا کہنا ہے کہ 5 سال کے ملٹی پل انٹری ویزے کے لیے درخواستیں لینا شروع کر دی ہیں، ملٹی پل انٹری ویزا تمام قومیتوں سے تعلق رکھنے والے افراد کو جاری کیا جائے گا۔ ملٹی پل انٹری سیاحتی ویزے کی فیس 650 درہم یعنی تقریبا 30 ہزار پاکستانی روپے مقرر کی گئی ہے، ویزے کے اجرا کے لیے ایک لاکھ 32 ہزار پاکستانی روپے کے اخراجات بھی ہوں گے،   پاکستانی قومیت رکھنے والوں کو اماراتی ملٹی پل انٹری سیاحتی ویزہ تقریباً 1 لاکھ 62 ہزار روپے میں ملے گا۔

ملٹی پل انٹری سیاحتی ویزے کے تحت 90 روز تک  متحدہ عرب امارات میں قیام کیا جا سکے گا اور اس میں 90 روز کی مزید توسیع بھی کی جا سکے گی۔

متحدہ عرب امارات کا پانچ سال کا سیاحتی ویزا سیلف اسپانسرڈ شپ کی بنیاد پر جاری ہو گا، ملٹی پل انٹری ویزے کے لیے میڈیکل انشورنس لازمی شرط ہے۔ ملٹی پل ویزے کے لیے درخواست گزار کو گزشتہ 6 ماہ کی بینک اسٹیٹمنٹ بھی  جمع کروانا ہو گی،  جس کے تحت درخواست گزار کے اکاؤنٹ میں کم سےکم 7 لاکھ پاکستانی روپے کے برابر ڈالر موجود ہونے چاہئیں ۔ 

متحدہ عرب امارات میں داخل ہونے کے لیے سیاحتی ویزوں کی مانگ گزشتہ کئی ہفتوں کے دوران 4 گنا بڑھ گئی ہے ، خاص طور پر ان لوگوں کی طرف سے جو دبئی ایکسپو 2020 میں شرکت کرنا چاہتے ہیں۔

خیال رہے کہ متحدہ عرب امارات کی کابینہ کی جانب سے دنیا بھر کے ملازمین کو متحدہ عرب امارات میں رہنے اور کام کرنے کے لیے ایک نیا ریموٹ ورک ویزے کا اجرا بھی کیا گیا ہے۔