سندھ ، بلوچستان کے مختلف علاقوں میں تیز بارش اور طوفانی ہوائیں چلنے کا امکان، الرٹ جاری

محکمہ موسمیات نے اس حوالے سے الرٹ جاری کردیا ، محکمہ موسمیات نے آگاہ کیا ہے کہ اس وقت ہوا کا ایک کم دباؤبھارت کے علاقے جنوبی گجرات میں موجود ہے اورامکان ہے کہ وہ شمال مغرب کی جانب حرکت کرے گا جس سے بحیرہ عرب میں ہوا کا کم دباؤ پیدا ہو گا اور جمعہ کے روز سمندری طوفان کا امکان ہے۔اس موسمیاتی نظام کے زیر اثر آج سے ہفتہ کے روز تک تقریباً تمام سندھ میں شدید بارشوں اور طوفانی ہوائوں کا امکان ہے۔

اسی طرح آج سے اتوار تک بلوچستان کے اضلاع پنجگور،قلات،خضدار ،کیچ ،آواران ،لسبیلہ اور گوادر میں بھی شدید بارشیں متوقع ہیں۔شدید بارشوں کے نتیجے میں کراچی ،بدین ،ٹھٹھہ ، حیدر آباد،دادو ،میر پور خاص ، شہید بے نظیر آباد ،لسبیلہ،سومیانی ،او مارو ،پسنی ،گوادر ،تربت اور جیوانی میں سیلاب کا خطرہ ہے ۔کراچی میں محکمہ موسمیات کا سمندری طوفان کی پیشگی اطلاع کا مرکز صورتحال کی نگرانی کر رہا ہے جو وقتاً فوقتاً طوفان کی تازہ صورتحال سے آگاہ رکھے گا۔