برطانیہ میں پیٹرول  بحران ، فوج میدان میں آگئی 

تفصیلات کے مطابق برطانیہ میں ٹینکر ڈرائیوروں کی کمی کی وجہ سے پیٹرول کی ترسیل میں خلل ایک بحران کی صورت اختیار کر گیا ہے اور عوام کئی روز سے شدید مشکلات سے دوچار   ہیں۔ غیرملکی میڈیا کے مطابق  برطانیہ میں پیٹرول بحران سے نمٹنے کیلئے پیرسے فوجی اہلکار پمپ تک پیٹرول کی ترسیل شروع کریں گے۔ خبرایجنسی کا کہنا ہے کہ  اس حوالے سے 200 اہلکار میدان میں اتریں گے، جن میں 100 ملٹری ٹینک ڈرائیورز بھی شامل ہیں ۔ جبکہ  300غیرملکی ٹرک ڈرائیورز کو بھی ہنگامی فوری ملک میں داخلے کی اجازت دی گئی ہے۔

برطانوی حکومت کی جانب سے جاری کردہ پریس ریلیز کے مطابق آرمی ٹینکر ڈرائیورز جلد تعینات کیے جائیں گے تاکہ ملک میں جاری ڈرائیوروں کی کمی کی وجہ سے پیٹرول کی قلت میں حکومت کو عارضی طور پر مدد فراہم کی جائے۔

یاد رہے کہ برطانیہ میں لاری ڈرائیوروں کی کمی نے کچھ مہینوں میں سپر مارکیٹس سے لے کر فاسٹ فوڈ کے کاروبار کو بھی  بری طرح متاثر کیا ہے۔ ڈرائیور دستیاب نہ ہونے کی وجہ سے پیٹرول کی سپلائی متاثر ہو رہی ہے اور لوگ پریشانی میں اپنی ضرورت سے زیادہ پیٹرول خرید رہے ہیں اور پیٹرول پمپوں پر میلوں لمبی قطاریں لگنے لگی ہیں۔

علاوہ ازیں  حکومت نے پٹرول کی قلت کو دور کرنے کےلیے نہ صرف پٹرولیم کمپنیوں کو مسابقتی قانون سے چھوٹ دینے کا اعلان کیا ہے  ، غیر ملکی ڈرائیوروں کیلئے  دسمبر تک  پرکشش معاوضوں پر 5 ہزار عارضی ویزے جاری کیے جائیں گے جبکہ پولٹری کی صنعت میں کام کرنے والوں کے لیے بھی پانچ ہزار پانچ سو ویزے جاری کرنے کا فیصلہ کیا  گیا ہے۔

برطانوی حکومت لاری ڈرائیوروں یا 'ایچ جی وی' لائنسنس رکھنے والے دس لاکھ ڈرائیوروں کو بھی خطوط ارسال کر رہی ہے تاکہ ان کو گاڑی چلانے  کرنے کی ترغیب دی جا سکے۔ اس کے علاوہ چار ہزار ایچ جی وی ڈرائیوروں کو ہنگامی بنیادوں پر تربیت دینے کا منصوبہ بھی بنایا جا رہا ہے۔

برطانوی نشریاتی ادارے کی رپورٹ کے مطابق بریگزٹ یا یورپ یونین سے علیحدگی اختیار کرنے کے بعد سال 2019 کی دوسری سہ ماہی اور 2021 کے دوران برطانیہ سے72ہزار  ڈرائیور واپس چلے گئے ہیں۔