دو کی بجائے ایک کپ چائے پئیں،اے سی کم استعمال کریں: رمیز راجہ

تفصیلات کے مطابق چیئرمین پی سی بی رمیز راجہ نے ملازمین سے ملاقات کی ہے رمیز راجہ نے بورڈ ملازمین سے عمران خان انکلوژر میں خطاب کیا،اس موقع پر ڈائریکٹرز سے لیکر لوئر اسٹاف اور گراؤنڈ اسٹاف سمیت تمام ملازمین موجود تھے۔

چیئرمین پاکستان کرکٹ بورڈ رمیز راجہ نے بورڈ ملازمین کو  فوری طور پر اخراجات کم کرنے کا حکم  دے دیا ۔

رمیز راجہ نے اپنے خطاب میں کہا کہ وزیر اعظم عمران خان نے مجھے بتایا کہ انہوں نے پرائم منسٹر ہاؤس اور آفس کے اخراجات کیسے کم کیے، ہمیں بورڈ میں اخراجات کم کرنا ہیں۔

چیئرمین پی سی بی کا کہنا تھا میرا فوکس صرف کرکٹ ہے، ہمیں کرکٹ کو اوپر لے کر جانا ہے کرکٹ کی بہتری کے لیے بہت کام کرنا ہے، گراس روٹ لیول کو بہتر کرنا ہے اور پچز کا معیار اچھا کرنا ہے۔

ان کا مزید کہنا تھا کہ پاکستان کرکٹ ٹیم کو نمبر ون بنانا ہے، نمبر ون ٹیم نہیں ہو گی تو ہم سب کے رہنے کا کوئی جواز نہیں  ہے، رہنے کے لیے کام کرنا ہے۔