وزیراعظم  نے کامیاب پاکستان پروگرام کا افتتاح کر دیا

تفصیلات کے مطابق اسلام آباد میں کامیاب پاکستان پروگرام کی افتتاحی تقریب سے خطاب کرتے ہوئے  وزیراعظم عمران خان  نے کہا کہ تمام افرادکو خراج تحسین پیش کرتاہوں،ہمیں74سال پہلےیہ پروگرام شروع کرناچاہئےتھا، کامیاب پاکستان پروگرام پروزیرخزانہ کومبارکبادپیش کرتاہوں۔ انہوں نے کہا کہ میں یہ سمجھتا ہوں کہ 74 سال قبل بڑی غلطی کی کہ ہم سمجھتے تھے کہ جب ہمارا ملک خوشحال ہوجائے، ہمارے پاس پیسہ آجائے پھر پاکستان کو فلاحی ریاست بنایا جائے۔ جہاں  امیروں کے جزیرے اور غریبوں کا سمندر ہو وہ ملک کامیاب نہیں ہوسکتا، ماضی میں غلط معاشی پالیسیاں اختیار کی گئیں، ریاست مدینہ کا ماڈل ہمارے لئے مشعل راہ ہے، مدینہ میں پہلے فلاحی ریاست قائم ہوئی پھر خوشحالی آئی، ریاست مدینہ دنیا کی تاریخ کا سب سے کامیاب ماڈل تھا۔

انہوں نے کہا کہ مہذب معاشرے میں احساس  اور انسانیت سے بڑھ کرکوئی شے نہیں ، چین نے نچلے طبقے کو اوپر اٹھایا، چینی صدرنے کہاکہ انہوں نے انتہائی غربت ختم کردی، چین نے نچلے طبقے کی ترقی کیلئےاقدامات کئےجس کےثمرات مجموعی ترقی کی صورت نکلے۔ وزیراعظم نے کہاکہ پہلی بار ملک میں یکساں نظام تعلیم رائج کیا، یکساں نظام تعلیم کیخلاف آج کتنی آوازیں اٹھ رہی ہیں، یکساں نظام تعلیم کیلئے کبھی کسی نے کوشش نہیں کی، ملکی نظام ایسا تھا صرف اوپر والا طبقہ ہی مراعات حاصل کرسکتا تھا، معاشرےمیں عدم مساوات کسی بھی ریاست کے زوال کی علامت ہے۔ وزیراعظم نے کہا کہ شوکت خانم کینسراسپتال میں ہر سال غریب مریضوں کا9ارب روپے کامفت علاج ہوتاہے، دنیامیں تیل کی قیمت100فیصد بڑھی ،پاکستان میں صرف 22فیصداضافہ کیاگیا۔

قبل ازیں وزیر خزانہ شوکت ترین نے تقریب سے خطاب کرتے ہوئے کہا کہ ماضی میں متوسط طبقے کی آمدن کیلئے کچھ نہیں کیا گیا، غریب صرف ترقی کے خواب ہی دیکھتا رہا، وزیراعظم نے کہا غریب کو با اختیار بنانے کیلئے کام ہونا چاہیے، معاشی ترقی کیلئے معاشی پالیسیوں کا تسلسل ناگزیر ہے، موجودہ حکومت پائیدار ترقی کیلئے اقدامات کر رہی ہے، پہلی بار ترقی کے سفر میں نچلے طبقے کو ترجیح دی گئی۔

کامیاب پاکستان پروگرام ملک میں غربت کے خاتمے میں کلیدی کردار ادا کرے گا۔ اس پروگرام کے تحت 14 سو ارب کے قرضے 37 لاکھ گھرانوں کو دیئے جائیں گے۔ کامیاب پاکستان پروگرام کے پانچ جزو ہیں۔ کامیاب کسان کے ذریعے کسانوں کو بلا سود قرضے دئیے جائیں گے۔  کامیاب کاروبار پروگرام کے تحت کاروبار کے لئے پانچ لاکھ تک بلا سود قرضے دئیے جائیں گے۔ سستا گھر سکیم کے تحت اپنا گھر بنانے کے لئے آسان اقساط پر فنانسنگ کی سہولت میسر ہوگی۔ حکومت پاکستان کے کامیابی سے جاری سکالر شپ سکیم اور صحت انصاف کارڈ کو کامیاب پاکستان پروگرام کے ساتھ منسلک کیا جائے گا۔