شہباز شریف نے بجلی مہنگی کرنے کو ظلم قرار دیدیا

تفصیلات کے مطابق شہباز شریف کا کہنا تھا کہ 3 سال سے زائد عرصے میں حکمرانوں نے عوام کو صرف مہنگائی در مہنگائی دی ہے، کھانے پینے کی اشیاء تک ہر چیز کی قیمت میں اضافہ کرپشن اور نااہلی کا نہ ختم ہونے والاسلسلہ ہے۔

مسلم لیگ ن کے صدر کا کہنا تھا کہ موجودہ حکومت کے آنے سے قوم کے لئے صرف برے دن آئے ہیں، حکومت کا ہر فیصلہ قوم کے لئے ایک نیا برا دن لے کر طلوع ہورہا ہے، مہنگائی کا قہر برساتا سورج حکومت کے خاتمے سے ہی غروب ہو گا۔

ان کا کہنا تھا کہ وفاقی حکومت نے مہنگائی میں کمی کے دعوؤں کے باوجود عوام پر پھر بجلی گرا دی، نیپرا نے بجلی کی قیمت ایک روپیہ 65 پیسے فی یونٹ بڑھانے کا اعلان کر دیا۔

شہباز شریف کامزید کہنا تھا کہ فی یونٹ بجلی 1 روپے 72 پیسے مہنگی ہونا ظلم ہےعوام پر مہنگائی، بجلی، گیس، پٹرول کی قیتوں میں اضافے کی مسلسل بجلیاں گرائی جارہی ہیں، موجودہ حکومت مہنگائی، کرپشن، نااہلی کی آسمانی بجلی بن کر قوم پر گری ہے۔