اسحاق ڈار اور کلثوم نواز کی کورونا ویکسین جعلی انٹری، کیس ایف آئی اے کو ارسال 

تفصیلات کے مطابق  کلثوم نواز اور اسحاق ڈار کی  کورونا ویکسین جعلی انٹری کے معاملے پر  سیکرٹری پرائمری اینڈ سکنڈری ہیلتھ کی جانب سے کیس فوری طور پر ایف آئی اے کو ارسال کردیا گیا اور ذمہ داران کے خلاف سخت ایکشن لینے کے احکامات جاری کردیے گئے۔

سیکرٹری عمران سکندر بلوچ نے کہا ہے کہ  دونوں فیک انٹریز جمنیزیم میلسی، وہاڑی اور چیف ایگزیکٹیو آفس، ملتان سے درج کی گئیں ہیں، دونوں سینٹرز کے متعلقہ ویکسینیٹرز کی تفصیلات  سائبر کرائم ونگ کو ارسال کر دی گئی ہیں،ہیلتھ انفارمیشن سروس ڈلیوری یونٹ کی جانب سے فیک انٹریز کی شناخت کی گئی۔

سیکرٹری عمران سکندر بلوچ کا کہنا ہے کہ  این سی او سی کو فیک اینٹریز کے روک تھام کے لیے  جامع تجاویز بھجوا دی ہیں، ڈیٹا انٹری سسٹم کو مزید بہتر اور مستحکم بنانے کے لئے مربوط نظام پر کام کیا جا رہا ہے۔