بلوچستان میں زلزلہ : شہبازشریف کا  قیمتی جانوں کے ضیاع پر اظہار افسوس

تفصیلات کے مطابق صدر مسلم لیگ ن اور اپوزیشن لیڈر قومی اسمبلی شہبازشریف نے  کہا کہ  بلوچستان  میں زلزلے سے متاثرہ   اضلاع میں ہونیوالے  قیمتی انسانی جانوں کے ضیاع پر بے حد دکھ اور افسوس ہے ، جاں بحق ہونے والوں کے اہل خانہ اور متاثرہ خاندانوں سے دلی تعزیت کرتے ہیں ۔ انہوں نے کہاک ہنگامی صورتحال کا تقاضا ہے کہ وفاق بلوچستان میں بھرپور امدادی کارروائیاں کرے ، ہیلی کاپٹرز کے ذریعے شدید زخمیوں کو ملک کے دیگر ہسپتالوں میں منتقل کیا جائے تاکہ زندگیاں بچ سکیں ۔

شہبازشریف نے مزید کہاکہ وفاقی حکومت امدادی کارروائیوں میں قائدانہ کردار ادا کرے، ہنگامی امداد کے ادارے بھرپور طورپر متحرک ہوں  اور اولین ترجیح لوگوں کی زندگیاں بچانے، محفوظ مقامات پر منتقل کرنے اور شیلٹر وخوراک کی فراہمی پر دی جائے ۔ ان کاکہنا تھا کہ اس سے قبل بھی قوم زلزلے کی قیامت خیزی اور اس کے شدید نقصانات دیکھ چکی ہے، اللہ تعالی ہم پر رحم فرمائے ۔ انہوں نے  اپیل کرتے ہوئے کہاکہ بلوچستان کے زلزلہ متاثرین سے پوری قوم بھرپور یک جہتی کا اظہار کرے اور  امدادی کارروائیوں میں اپنا حصہ ڈالیں۔  پارٹی رہنمااور کارکنان امدادی کارروائیوں میں ہاتھ بٹائیں ، اداروں کے ساتھ مل کر معاونت کریں ۔ وفاقی حکومت صوبائی حکومت کی مشاورت سے متاثرین زلزلہ کے لئے خصوصی پیکج کی تیاری پر کام شروع کرے ۔ 

واضح رہے کہ بلوچستان کےمختلف علاقوں میں رات گئے 5.9 شدت کے زلزلے نے تباہی مچادی ، زلزلے  کے باعث 20 سے زائد افراد جاں بحق اور 300 سے زائد افراد زخمی ہوگئے ہیں ۔