سعودی عرب کی سلامتی یقینی بنانےکیلئے پاکستان پرعزم ہے، وزیراعظم

وزیراعظم عمران خان  نے پاکستان سعودی عرب انوسٹمنٹ فورم سے خطاب کرتے ہوئے کہا کہ  بھارت پاکستان اچھے ہمسائے کے طور پر آگے بڑھ سکتے ہیں، کشمیریوں کو حق ملے تو پاکستان اور بھارت کے درمیان کوئی مسئلہ نہ رہے، بھارت مقبوضہ کشمیر کامعاملہ کشمیری عوام کی امنگوں کے مطابق حل کرے تو ہمارا کوئی جھگڑا نہیں  ہے۔انہوں نے کہا کہ یہ مناسب وقت نہیں ہے میچ پر بات کرنے کا، کل رات پاکستان نے بھارت کو میچ میں بری طرح پچھاڑ دیا۔

وزیر اعظم کا کہنا  تھا کہ  پاک سعودی تعلقات دوستانہ اور تاریخی ہیں، سعودی عرب اور پاکستان مشکل وقت کے دوست ہیں۔ سعودی عرب کی سلامتی یقینی بنانےکیلئے پاکستان پرعزم ہے، پاکستان ہمیشہ اپنے مخلص دوستوں کو یاد رکھتا ہے۔ 

وزیر اعظم عمران خان نے کہا کہ 60کی دہائی میں پاکستان ایشیا میں تیزی سے ترقی کرنے والا ملک تھا، قومی ایئرلائن پی آئی اے اس وقت کی بہترین ایئر لائن تھی، پاکستان کی اکثریتی آبادی کی عمر 30 سال سے کم ہے۔ وزیراعظم نے مزید کہا  کہ پاکستان میں غیر ملکی سرمایہ کاروں کیلئے وسیع مواقع  ہیں۔