جرمن سفیر برن ہارڈ سٹیفن کی حمزہ شہباز سے ملاقات

تفصیلات کے مطابق جرمن سفیر برن ہارڈ سٹیفن کی اپوزیشن لیڈر پنجاب اسمبلی حمزہ شہباز شریف سے ملاقات ہوئی۔جرمین سفیر برن ہارڈ سٹیفن نے کہا کہ  اپوزیشن لیڈر کا پاک جرمن تعلقات میں کلیدی کردار ہے،  حمزہ شہباز ایک مضبوط شخصیت کے حامل سیاستدان کے طور پر پہچانے جاتے ہیں۔ جرمن سفیر برن ہارڈ نے حمزہ شہباز شریف کو کامیاب دورہ جنوبی پنجاب پر بھی مبارک باد پیش کی۔

اپوزیشن لیڈر حمزہ شہباز نے اس موقع پر کہا کہ  ملک میں جمہوری نظام اور سیاسی قیادت  تشدد اور عدم برداشت کے سامنے ایک بند کی سی حیثیت رکھتا ہے، ملک کو اس وقت معاشی ، سیکورٹی ، خارجہ  اور مشکل صورت حال کو سنبھالنے کا شدید بحران کا سامنا ہے،  بدترین صورتحال سے نکلنے کا واحد راستہ تمام اسٹیک ہولڈرز کا ایک جگہ مل بیٹھنے اور مکالمہ کرنے میں ہی ہے۔  حمزہ شہباز نے مسلم لیگ ن کے دور حکومت میں نیشنل ایکشن پلان پر کامیابی سے عملدرآمد ہونے کا بھی ذکر کیا۔

حمزہ شہباز کا کہنا تھا کہ  عوام کی خدمت ہی مسلم لیگ ن کا واحد سیاسی ایجنڈا ہے،  اگلے انتخابات میں مینڈیٹ ملنے کےبعد بھی اسی پر کاربند رہیں گے، صاف شفاف انتخابات اور سیاسی مواقع ہی عوام کا جمہوریت پر یقین بحال کر سکتے ہیں، مسلم لیگ ن انتخابات کی تیاری کر رہی ہے اور اس ضمن میں اپنے ورکرز کو  متحرک کرنا شروع کر دیا ، مسلم لیگ ن میں تمام اسٹیک ہولڈرز کو ساتھ لے کر چلنے کی صلاحیت ہے ،  تاریخی مہنگائی،  بجلی گیس اور پیٹرول کی قیمتوں میں ہوشربا اضافے نے عوام کی کمر توڑ کر رکھ دی ہے ۔