کھلاڑیوں کے کورونا ٹیسٹ مثبت آنے پر پی سی بی پریشان ، اہم فیصلے متوقع

تفصیلات کے مطابق پاکستان سپر لیگ   سیزن 6 کے مقابلے کراچی میں  جاری ہیں ، تاہم حال ہی میں اسلام آباد یونائیٹڈ کے کھلاڑی سمیت تین غیر ملکی  افراد کے کورونا ٹیسٹ مثبت آنے کے بعد  پی سی  بی کی جانب سے  صورتحال کا جائز ہ لیا جارہا ہے ۔ جس میں لاہور مرحلے کے تمام  میچز کراچی  میں کرانے سمیت کئی آپشن زیر غور ہیں ۔ تاہم  تمام اسٹیک ہولڈرز سے  مشاورت کے بعد فیصلہ ہو گا۔دس مارچ سے دوسرا مرحلے کا آغاز لاہور میں ہورہا ہے ، جبکہ ایونٹ کا فائنل 22 مارچ کو قذافی اسٹیڈیم لاہور میں  شیڈول ہے ۔

ذرائع کے مطابق پی سی بی حکام  کی نیشنل کمانڈ اینڈ کنٹرول سنٹر کے ساتھ بات چیت جاری ہے  ، اس حوالے سے  ا گلی کوویڈ ٹیسٹنگ اہم قرار دی گئی ہے ۔مجموعی طور پر پی سی بی کی جانب سے 244  افراد کے کورونا ٹیسٹ کروائے گئے ہیں  جن میں تین نتائج مثبت آئے ہیں ،ان افراد کو قرنطینہ کردیا گیا ہے ۔ سیکیور ببل  کے اندر 300 افراد موجود ہیں جن میں کھلاڑی ، معاون عملہ  ، مالکان ، میچ آفیشلز اور سیکیورٹی آفیسر شامل ہیں  ، پی ایس ایل ٹیموں کی اگلی  ٹیسٹنگ جمعرات کوہوگی۔ ٹیسٹ کے  نتائج کے بعد لائحہ عمل کا اعلان کیاجائےگا۔

خیال رہے کہ گزشتہ روز پاکستان کرکٹ بورڈ (پی سی بی) کے ڈائرکٹر میڈیا سمیع الحسن برنی نے پریس کانفرنس کرتے ہوئے بتایا  تھا کہ پاکستان سُپر لیگ (پی ایس ایل) کے سیزن 6 کا کوئی میچ ملتوی نہیں ہوگا، میچز شیڈول کے مطابق ہوں گے۔

اس سے قبل پاکستان سُپر لیگ (پی ایس ایل) کے سیزن 6 کے میچز چند دنوں کیلئے ملتوی کیے جانے کا امکان ظاہر کیا جارہا تھا۔

واضح رہے کہ سپر لیگ میں چھ اسلام آباد یونائیٹڈ، دفاعی چیمپیئن کراچی کنگز، لاہور قلندرز، ملتان سلطانز، پشاور زلمی اور کوئٹہ گلیڈی ایٹرز کی ٹیمیں ٹائٹل کے لیے پنجہ آزمائی کررہی ہیں ۔  سپر لیگ سیزن 6 کا  یہ ایونٹ دو مرحلوں میں کھیلا جائےگا۔ 20 فروری سے 7 مارچ تک میچز کراچی میں ہونگے۔ دس مارچ سے دوسرا مرحلہ لاہور میں شروع ہوگا، جبکہ ایونٹ کا فائنل 22 مارچ کو قذافی اسٹیڈیم لاہور میں  ہوگا ۔کورونا وباء کے دوران تمام اسٹیک ہولڈرز کی صحت اور حفاظت کے پیش نظر 34 میچز پر مشتمل ایونٹ کراچی اور لاہور میں کروانے کا فیصلہ کیا گیاتھا ۔