ویسٹ انڈیز ٹیم کو آسان ہدف نہیں لیں گے،بابر اعظم

کپتان قومی کرکٹ ٹیم بابر اعظم نے ورچوئل پریس کانفرنس کرتے ہوئے کہا کہ   جس طرح فتوحات حاصل کر رہے ہیں کوشش ہوگی یہ سلسلہ جاری رہے ، شائقین کے سو فیصد داخلے کی اجازت ہے ، امید کرتے ہیں شائقین اسٹیڈیم کا رخ کریں گے، کوچز ٹیم کے ساتھ ہونے چاہیں ،پی سی بی اس حوالے سے زیادہ بہتر بتا سکتا ہے، رمیز راجہ سے ورلڈ کپ سے قبل بات ہوئی تھی ،چیئرمین سے کیا باتیں ہوئیں یہاں بتا نہیں سکتا ۔

بابر اعظم نے کہا کہ  نیوزی لینڈ کو پاکستان میں رکنا چاہیے تھا ، ویسٹ انڈیز ٹیم کا شکر گزار ہوں کہ وہ یہاں آئے، لوگ سوچ رہے تھے کہ معلوم نہیں اب پاکستان میں انٹرنیشنل کرکٹ ہوگی یا نہیں، ویسٹ انڈیز ٹیم کو آسان ہدف نہیں لیں گے ، دوران سریز اپنی سو فیصد کارکردگی دیں گے،  ویسٹ انڈیز کے پلیئرز ٹی ٹوئنٹی میں مہارت رکھتے ہیں۔

ان کا کہنا تھا کہ  بطور کپتان مجھے پتا ہونا چاہیے کہ کھلاڑیوں سے کیسے پرفارم کروانا ہے ،کوشش کرتا ہوں کہ کھلاڑیوں کے مسائل سنوں،کھلاڑیوں کو اعتماد دے کر بات کرتا ہوں، ہم محنت کر رہے ہیں جس کے نتائج سامنے آ رہے ہیں۔ ثقلین مشتاق کھلاڑیوں کو سپورٹ کرتے ہیں ، ثقلین مشتاق کہتے ہیں کہ ہم بائیس کروڑ عوام کیلئے کھیل رہے ہیں ۔

قومی کرکٹ ٹیم  کے کپتان نے مزید کہا کہ  کھلاڑی جب کورونا پازیٹیو ہوتے ہیں تو مشکل وقت ہوتا ہے ، ہم سب اس مشکل وقت سے گزرچکے ہیں ، آئسولیشن کے دوران دماغ میں منفی باتیں آتی ہیں ، لیکن اس کے باوجود ہم کچھ پازیٹیو کرنے کی کوشش کرتے ہیں۔