پاکستان اور سنگا پور کے درمیان کئی بنیادی  مماثلتیں پائی جاتی ہیں لیکن ایک فرق کی وجہ سے آج سنگا پور کاشمار دنیا کی ترقی یافتہ اقوام میں ہوتا ہے۔ جبکہ پاکستان کوتیسری دنیامیں ہرلحاظ سے پسماندہ ترین ملک شمار کیا جاتا ہے ۔ پاکستان کی طرح سنگا پورمیں بھی تین بڑی مقامی زبانیں بولی جاتی ہیں اور  چوتھی  انگریزی ہے۔ بدھ ازم سب سے بڑا مذہب ہے لیکن عیسائی ، مسلمان اور ہندو بھی بڑی تعداد میں موجود ہیں۔  ساڑھے پانچ ملین سے زائد آبادی کا یہ ملک  ثقافتی اعتبار سے  چینی ، انڈین ، مالے اور دیگر اقوام  سے تعلق رکھنے کے باوجود ایک  قوم بن گیا۔ اس کی ایک ہی وجہ ہے کہ وہاں قومی سوچ کی حامل سیاسی حکومت پہلے دن سے بر سر اقتدار ہے ۔ٹرانسپرنسی انٹرنیشنل کی رپورٹ کےمطابق سنگا پور 2020 میں کرپشن فری ممالک  کی فہرست میں تیسرے نمبر پر ہے ۔ سنگا پوردنیا کے ترقی یافتہ ممالک کی فہرست میں کیسے شامل ہوا ؟  آزادی کے بعد سے اب تک برسراقتدارجماعت پیپلز ایکشن پارٹی  نے اس وقت حالات کا اندازہ لگایاتوپتہ چلا ان کے پاس ایک ایسا ملک تھا جہاں ساحلوں کے علاوہ کچھ نہیں تھا ۔ قدرتی وسائل سے محروم ملک کے سامنےایک طرف کمیونز م کا بڑھتا سیلاب تھا تو دوسری جانب سرمایہ دارانہ نظام  کا عفریت۔ ساؤتھ ایسٹ ایشیا میں چینی کیمونزم  کے بڑھتے اثرات کو روکنے کے لئے تائیوان ، ہانگ کانگ ، جنوبی کوریا اور سنگا پور کو ایشین ٹائیگرز  بننے کی پیشکش کی گئی ۔ سرد جنگ کے زمانے میں ان ممالک کو معاشی مراکز کا درجہ حاصل  ہوا جو آج بھی برقرار ہے ۔پیپلز ایکشن پارٹی نے ملک کو فری مارکیٹ اکانومی کے لئے کھول دیا۔  ملک میں موجود افراد کو کاروبار اور جدید انڈسٹریل ٹریننگ سے آراستہ کیا ۔ آج سنگاپورمیں دنیاکی7 ہزار ملٹی نیشل کمپنیوں کے مرکزی  یا ریجنل  دفاترموجود ہیں۔ یہ ایشیا  کاواحدملک ہے جسے اکنامک ریٹنگ میں ٹرپل اے گریڈ حاصل ہے ۔ سنگاپورجی ڈی پی کے اعتبار سے دنیا میں فی کس آمدنی  میں دوسرے نمبر پر ہے  ۔ سنگاپورسب سے ہنرمند انسانی وسائل رکھنےوالا  ملک بن گیا۔یہ سب ممکن بنانے کے لئے تعلیم ، ہیلتھ کئیر،انسانی تحفظ اور ذاتی گھر کی فراہمی ریاستی ذمہ داری  قرار دیا گیا ۔ ملک میں 91 فیصد لوگ اپنے گھر کے مالک ہیں ۔  دنیا کے بہترین نظام صحت کی بدولت سنگاپور کے لوگ دنیامیں طویل العمر ہیں اور بچوں کی  شرح اموات سب سے کم ہے ۔انسانی ترقی میں سنگاپور دنیامیں نویں نمبر پر ہے۔ فری مارکیٹ اکانومی نے  سنگاپور کو  دنیا کے لئے ٹیکس ہیون  ، جوئے کا مرکز اور انسانی سمگلنگ جیسی لعنتوں کا شکار بھی  کیالیکن سیاسی حکومت نے صرف انسانی اورمعاشی ترقی کو ہدف بنا کر پالیسیز بنائیں۔ البتہ  قومی دائرے میں پریس اورسیاسی ماحول میں مخصوص آزادیاں دی گئیں تاکہ قومی معاملات میں بیرونی مداخلت کم سے کم ہو۔

 اس کے برعکس پاکستان نے 1947 میں برطانیہ سے آزادی حاصل کی ۔ پاکستان بھی مختلف زبانوں اور ثقافتوں کا مجموعہ ہے ۔ ہمارے پاس دینی تعلیمات میں شامل اعلیٰ اخلاق اور مساوات کا  نظریہ تھا جس پر ریاست کی بنیاد رکھی جا سکتی تھی لیکن قومی سوچ سے عاری سیاسی قیادتوں نے ملک میں غیر آئینی حکومت سازی کو ترجیح دی ۔ اقتدار  اور دولت کی ہوس نے ملک کو اس دوراہے پر لا کھڑا کیا ہے۔ بہترین قدرتی ، زرعی ، معدنی ، آبی اور ساحلی وسائل رکھنے کے باوجود  پاکستان  انسانی ترقی میں  154 ویں نمبر پر ہے ۔ پچھلے 73 برسوں  سے مسلسل لوٹ مار کی جارہی ہے ۔ سرکاری دستاویزات کے مطابق ہر برطرف کی گئی حکومت کی  جڑ  کرپشن  تھی ۔اس میں کوئی شک نہیں کہ پاکستان کے حکمران طبقات کی کرپشن،اختیارات کے ناجائز استعمال اور ذاتی مفادات کو ترجیح دینا  اداروں کی تباہی کا باعث  بناہے ۔  پاکستان کی آدھی سے زائد آبادی انتہائی غربت کا شکار ہے۔کورونا کے باعث  اس  میں مزید  اضافہ ہواہے ۔تحریک انصاف کی موجودہ حکومت احتساب کانعرہ لگا کر اقتدارمیں آئی  تھی ۔ کرپشن میں کمی تو درکنار اس میں مسلسل اضافہ ہو رہا ہے۔ ایک جانب حکومت اورنیب  دعوے دارہیں کہ سینکڑوں ارب روپے کرپٹ افراد سے وصول کئے گئے لیکن  ٹرانسپرنسی انٹرنیشنل کی کرپشن پرسیپشن انڈیکس کی تازہ رپورٹ کا منظر نامہ مختلف ہے ۔  پاکستان 180 ممالک میں 124ویں نمبر پر ہے ۔ پاکستان  2019  میں 120 ویں اور 2018 میں 117 ویں  نمبر پر تھا ۔ کرپشن انڈیکس  میں بڑھتی ریٹنگ  پر    وزیر اعظم کے ترجمان  شہباز گل  نےاسے سابق حکومت کا ڈیٹا قرار دے کر مدعا مسلم لیگ  ن کی حکومت پر ڈال دیا جو کہ غیر منطقی لگتا ہے ۔    آٹے ، چینی  اور پٹرول  اسکینڈلز پر قصور وار افراد کو   تاحال سزا نہیں مل سکی ۔ یہاں تک کہ اپوزیشن پر کرپشن کیسز کی بھرما ر کے باوجود کسی کو سزا نہیں ملی   ۔ عام  آدمی جانناچاہتا ہے کہ احتساب کس کا ہو رہا ہے ؟ آدھا وقت گزر گیا۔ وزیر اعظم عمران خان کنفوژ ہیں کہ ریاست مدینہ جیسی ہو ، چین کا نظام ہو یا ملائشیا جیسا۔ ایک بات یاد رکھیں کہ نظام چاہے جو بھی ہو اس کے لئے قومی سوچ کی حامل قیادت کی ضرورت ہوتی ہے۔ سنگاپور سے ہی سیکھ لیں۔