پاکستان نے بھارت کے غیر قانونی طور پر زیر قبضہ جموں و کشمیر میں انسانی حقوق کی سنگین پامالیوں پر گہری تشویش کا اظہار کرتے ہوئے کہا ہے کہ مقبوضہ علاقہ میں حکام کشمیریوں کے ساتھ سخت غیر انسانی سلوک جاری رکھے ہوئے ہیں۔

دفتر خارجہ کی ترجمان ممتاز زہرہ بلوچ نے جمعہ کو یہاں پریس بریفنگ میں کہا کہ چند روز قبل ضلع گاندربل میں شیر کشمیر یونیورسٹی آف ایگریکلچر سائنس اینڈ ٹیکنالوجی کے سات کشمیری طلباءکو کرکٹ ورلڈ کپ کے فائنل میچ میں آسٹریلیا کی بھارت کے خلاف جیت کا جشن منانے پر گرفتار کیا گیا۔

ترجمان دفتر خارجہ  نے رپورٹس کے حوالہ سے بتایا کہ ان کی گرفتاری بھارت کے بدنام زمانہ انسداد دہشت گردی قانون کے تحت عمل میں آئی ہے۔ انہوں نے کہا کہ یہ چونکا دینے والی بات ہے کہ ورلڈ کپ کے دوران ایک کرکٹ ٹیم کو خوش کرنا جس کا میزبان بھارت تھا کو بھارت میں دہشت گردی کی کارروائی تصور کیا جاتا ہے۔

ترجمان نے کہا کہ یہ اقدام بھارت کے انسداد دہشت گردی کے قوانین کے غلط استعمال اور دہشت گردی کے الزامات کے غلط اطلاق کا واضح مظہر ہے۔ انہوں نے کہا کہ اقوام متحدہ کے خصوصی طریقہ کار کا ایک گروپ پہلے ہی اس بات پر زور دے چکا ہے کہ بھارت کا انسداد دہشت گردی قوانین کا فریم ورک غلط استعمال کے لئے بنایا گیا ہے۔

ترجمان نے امید ظاہر کی ان طلباء کو رہا کر دیا جائے گا۔ انہوں نے کہا کہ یہ بات اہم ہے کہ بھارت کو ان سخت قوانین کو منسوخ کرنا چاہئے اور اپنے غیرقانونی طور پر زیر قبضہ جموں و کشمیر میں اختلاف رائے کو دبانے کے لئے دہشت گردی کا استعمال بند کرنا چاہئے۔

پاکستان نیشنل کونسل آف دی آرٹس (پی این سی اے) نے ازبکستان اور پاکستان کے مشترکہ ثقافتی ورثے کی یاد میں تصویری نمائش کا انعقاد کیا۔پی این سی اے نے پاکستان اور ازبکستان کے درمیان سفارتی تعلقات کی 31 ویں سالگرہ منانے کے لیے ایک دلکش تصویری نمائش کا اہتمام کیا۔

پی این سی اے کے احاطے میں منعقد ہونے والی یہ اہم تقریب دونوں ممالک کے درمیان پائیدار ثقافتی تعلقات اور مشترکہ ورثے کا ثبوت ہے۔ نمائش کا افتتاح پاکستان میں ازبکستان کےسفیر اویبک عثمانوف، وفاقی وزیر برائے قومی ورثہ و ثقافت سید جمال شاہ نے پی این سی اے کے ڈائریکٹر جنرل ایم ایوب جمالی کے ہمراہ کیا۔

ازبکستان کے سفیر اویبک عثمانوف نے افتتاحی تقریب کے دوران تمام حاضرین کا شکریہ ادا کیا اور سفارتی تعلقات کی تاریخی اہمیت کو اجاگر کیا۔اپنے خطاب کے دوران سفیر نے اس شاندار تقریب کے انعقاد میں بھرپور تعاون اور رہنمائی پر وفاقی وزیر برائے قومی ورثہ و ثقافت سید جمال شاہ کی تہہ دل سے تعریف کی۔ انہوں نے پاکستان نیشنل کونسل آف آرٹس کے ڈی جی محمد ایوب جمالی کا بھی شکریہ ادا کیا۔ انہوں نے دو پاکستانی سفیروں عرفان یوسف شامی اور ریاض احمد بخاری کو گرمجوشی سے سلام پیش کیا اور دوطرفہ تعلقات کو فروغ دینے میں ان کی انتھک کوششوں کا اعتراف کیا۔

وفاقی وزیر سید جمال شاہ نے اپنے خطاب میں ازبکستان اور پاکستان کے مشترکہ ثقافتی ورثے میں شامل خوبصورتی، تنوع اور تاریخی اہمیت کو پیش کرنے میں نمائش کے کردار پر زور دیا۔ انہوں نے اسے ایک بصری داستان کے طور پر بیان کیا، جس میں مشترکہ روایات، فنکارانہ اظہار، اور پائیدار میراث کے دھاگوں کو ایک ساتھ باندھا گیا جو دونوں ممالک کے درمیان دوستی اور تعاون کو فروغ دے رہا ہے۔ نمائش ایک مشترکہ کوشش، تاریخی تصویروں کا ایک سابقہ مجموعہ پیش کرتی ہے جو ازبکستان اور پاکستان کے رہنمائوں کے درمیان فعال اور متحرک بات چیت کو ظاہر کرتی ہے۔

یہ نمائش خاص طور پر گزشتہ تین دہائیوں کے دوران دونوں ممالک کے رہنمائوں، وزراء، سفارت کاروں اور حکام کی جانب سے کیے گئے تعاون کو نمایاں کرتی ہے، جس سے دوطرفہ مضبوط تعلقات کو فروغ ملتا ہے۔جمال شاہ نے ازبکستان اور پاکستان کے درمیان تعلقات کو مضبوط بنانے اور باہمی افہام و تفہیم کو فروغ دینے میں ثقافتی سفارت کاری کی اہمیت کا اعادہ کیا۔

انہوں نے کہا کہ دونوں ممالک کی مشترکہ تاریخ اور ثقافتی وابستگیوں کو جوڑنے میں یہ نمائش اہم کردار ادا کرے گی۔ یہ نمائش ثقافتی سفارت کاری کے لیے غیر متزلزل عزم اور ازبکستان اور پاکستان کے درمیان مضبوط تعلقات کو فروغ دینے کا ثبوت ہے۔ نمائش 3 دسمبر 2023 تک عوام کے لیے کھلی رہے گی۔

نگران وفاقی وزیر برائے نجکاری فواد حسن فواد کی زیر صدارت نجکاری کمیشن بورڈ کا اجلاس منعقد ہوا جس میں نیویارک میں واقع روزویلٹ ہوٹل کی نجکاری/جوائنٹ وینچر ڈویلپمنٹ کے لیے مالیاتی مشیر کی تقرری کی منظوری دی گئی۔ وزارت نجکاری کی جاری کردہ پریس ریلیز کے مطابق دیگر فیصلوں میں بورڈ نے نندی پور پاور پلانٹ (این پی پی) اور گڈو پاور پلانٹ (جی پی پی) کو کابینہ کمیٹی برائے نجکاری کے ذریعے نجکاری پروگرام سے ڈی لسٹ کرنے کے علاوہ پی آئی اے سی ایل کی نجکاری سے متعلق مالیاتی خدمات کے معاہدے پر عمل درآمد کی نگرانی کے لیے ایک ٹرانزیکشن کمیٹی کی منظوری دینے کی بھی سفارش کی۔ پاک چائنا فرٹیلائزر لمیٹڈ کی نجکاری کے بعد کے مسائل پر بھی تبادلہ خیال کیا گیا ۔

روزویلٹ ہوٹل کے لین دین کے لیے تکنیکی اور مالیاتی تجاویز کو مدعو کرنے کا اشتہار 08 ستمبر 2023 کو شائع ہوا تھا۔ چار دلچسپی رکھنے والی جماعتوں نے اپنی تجاویز پیش کیں۔ کنسورشیم کو طے شدہ معیار کے مطابق تشخیص کی بنیاد پر “سب سے اوپر درجہ کی دلچسپی رکھنے والی پارٹی” قرار دیا گیا۔ بورڈ نے ایک مذاکراتی کمیٹی تشکیل دی اور اسے اعلیٰ درجہ کی بولی لگانے والے کے ساتھ مالیاتی خدمات کے معاہدے کو انجام دینے کا کام سونپ گیا ہے۔اجلاس میں بورڈ کو حال ہی میں ارنسٹ ینگ ایل ایل سی دبئی کی قیادت میں قائم کنسورشیم کے ساتھ پی آئی اے سی ایل کی نجکاری کے لیے مالیاتی خدمات کے معاہدے کے بارے میں بھی بریفنگ دی گئی۔

بورڈ نے پی آئی اے سی ایل کی تقسیم کے لیے مالیاتی معاہدے کے نفاذ کی نگرانی کے لیے سیکریٹری نجکاری کمیشن کی سربراہی میں ایک ٹرانزیکشن کمیٹی کی منظوری دی۔ بورڈ نے 425 میگاواٹ کے نندی پور پاور پلانٹ اور 747 میگاواٹ کے گڈو پاور پلانٹ سے متعلق پانچ سالوں سے زیر التواء دیرینہ مسائل کا احاطہ کرتے ہوئے کابینہ کمیٹی برائے نجکاری (سی سی او پی) سے پاور پلانٹس کو نجکاری پروگرام سے خارج کرنے کی سفارش کی۔ بورڈ نے پاک چائنہ فرٹیلائزرز لمیٹڈ کے معاملے میں معاملات اور قانونی چارہ جوئی پر غور کرنے کے بعد نجکاری کمیشن کو ہدایت کی کہ وہ اپنے بقایا جات کی وصولی کے لیے مختلف عدالتوں میں مقدمات کو تیزی سے نمٹانے اور اس مقصد کے لیے ماہر وکیل کی خدمات حاصل کرے۔