2021 میں پنجاب لینڈ ریکارڈ اتھارٹی کا اراضی ریکارڈ سنٹر کی تعداد میں پیش قدر اضافہ

تفصیلات کے مطابق وزیر اعلی پنجاب کے وژن اور عوامی سہولت کے پیش نظر 2021 میں پنجاب لینڈ ریکارڈ اتھارٹی نے اراضی ریکارڈ سنٹر کی تعداد میں پیش قدر اضافہ کیا ہے۔ نادرا، بینکوں اور دیہی مراکز مال سے الحاق کی بدولت یہ تعداد5000 سے زائد ہوچکی ہے۔ سنٹرز کے دائرہ کار میں وسعت کی بدولت خدمات کے حجم اور سرکاری خزانہ کی آمدن میں بتدریج اضافہ کا مشاہدہ کیا گیا ہے۔

 2021 میں مجموعی طور پر قریباً40 لاکھ مالکان و حقداران اراضی کو فرد کے اجرا اور تصدیق انتقالات کی کمپیوٹرائزخدمات فراہم کی گئیں۔ ان خدمات کے عوض صوبائی گورنمنٹ اور پلرا چارجز کی مد میں سے کم و بیش سوا پندرہ ارب روپے سرکاری خزانہ میں جمع کیے گئے۔کل27 لاکھ فردات میں 18لاکھ سے زائدفردات اراضی ریکارڈ سنٹر، ساڑھے5لاکھ نادرا ای سہولت،قریباً2لاکھ دیہی مراکز مال، ایک لاکھ آن لائن جبکہ 31ہزار اور 21ہزار فردات موبائل مراکز اوربینکوں سے جاری کی گئیں۔

اسی طرح سوا بارہ لاکھ تصدیق شدہ انتقالات میں قریباً 11لاکھ انتقالات اراضی ریکارڈ سنٹر، سوا لاکھ دیہی مراکز مال،40ہزارموبائل مراکز اور 1800 انتقالات کی تصدیق بذریعہ بینک کی گئی۔علاوہ ازیں رجسٹری اور انتقالات میں مطابقت کے لیے تمام سب رجسٹرار دفاتر کوبھی کمپیوٹرائزڈ کر دیا گیا ہے۔

وزیر اعظم کے کرپشن فری پاکستان وژن کے تحت پلرا میں عوامی شکایات کے اندراج اور فوری حل کے لیے مخصوص ٹیم تشکیل دی گئی ہے۔ پلرا میں پرائم منسٹر پورٹل کے ذریعے 2021 میں 479 شکایات موصول ہوئی ہیں۔جن پر فوری کاروائی کرتے ہوئے سائلین کو ریلیف فراہم کیا۔ پلرا میں جزا وسزا کے نظام کو مضبوط بنانے کے لیے عملہ کے خلاف موصول ہونے والی شکایات کی بنا پر سال 2021 میں 99 آفیسر اور آفیشلز کے خلاف انکوائری اور دیگر انضباطی کاروائی مکمل کرتے ہوئے 34افراد کو نوکری سے برخاست کیاگیاہے۔    

پلرا کی جانب سے دیگر اصلاحتی اقدامات بھی زیر عمل ہیں۔ یونیورسل رسائی کے ذریعے بہت جلد سائلین کو کسی بھی جگہ سے اپنے مطلوبہ علاقہ کی خدمات حاصل کرنے کی سہولت میسر کی جائے گی۔ لینڈ ریکارڈ کے متحد اور مربوط نظام رائج کرنے کے لیے شہری اراضی کے ریکارڈ کی کمپیوٹرائزیشن کا بھی جلد آغاز کر دیا جائے گا۔