کراچی میں کورونا کیسز کی شرح 10 فیصد سے تجاوز کرگئی 

تفصیلات کے مطابق شہر قائد میں کورونا کے وار جاری ہیں ، وفاقی وزارتِ صحت کے حکام  کاکہنا ہے  کہ کراچی میں اومی کرون ویرینٹ دوسرے ویرینٹس کی جگہ لے رہا ہے، یہاں کورونا وائرس کے کیسز کی شرح 10 اعشاریہ 25 فیصد تک جاپہنچی ہے ۔ 

کراچی میں  24 گھنٹے کے دوران 6 ہزار 340 کورونا ٹیسٹ کئے گئے ہیں جن میں  6 ہزار 340 میں سے 650 افراد کی ٹیسٹ رپورٹ مثبت آئی ۔ 

وفاقی وزارتِ صحت کے حکام کے مطابق  ملک کے دوسرے بڑے شہر لاہور میں بھی کورونا کے مثبت  کیسز کی شرح ساڑھے 5 فیصد سے زائد ہو گئی، جبکہ پاکستان میں کورونا وائرس کے کیسز کی مجموعی شرح ڈھائی فیصد سے زائد ہوچکی ہے ۔ 

واضح رہے کہ پاکستان میں کورونا وائرس کے یومیہ کیسز میں ایک مرتبہ پھر اضافہ دیکھنے میں آرہا ہے اور گزشتہ 24 گھنٹوں کے دوران ایک ہزار293کیسز رپورٹ ہوئے جوکہ پچھلے دو ماہ کے عرصے میں نئے کورونا کیسز کی سب سے زیادہ یومیہ تعداد ہے۔

نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  پاکستان  میں گزشتہ 24 گھنٹوں کے دوران 6 افراد انتقال  کرگئے جس کے بعد اموات کی مجموعی تعداد 28ہزار 961ہوگئی ہے ۔

 یاد رہے کہ پاکستان میں کورونا وائرس کا پہلا کیس 26 فروری 2020  کو ملک کے سب سے بڑے شہر کراچی میں سامنے آیا تھا۔