تھوڑا سا بھی احساس ہے، اللہ سے ڈر نہیں لگتا: مریم نواز وزیراعظم پر برس پڑیں 

تفصیلات کے مطابق سماجی رابطے کی ویب سائٹ ٹوئٹر پر پیغام میں  مسلم لیگ ن کی نائب  صدر مریم نواز نے  مری کی صورتحال پر  دکھ  کا اظہار کرتے ہوئے وزیراعظم کومخاطب کرتے ہوئے  کہا کہ  تھوڑا سا بھی احساس ہے عوام کا یا رحم سے بالکل دل عاری ہے؟ اللّہ سے ڈر نہیں لگتا ؟

تھوڑا سا بھی احساس ہے عوام کا یا رحم سے بالکل دل عاری ہے؟ اللّہ سے ڈر نہیں لگتا ؟ @ImranKhanPTI

— Maryam Nawaz Sharif (@MaryamNSharif) January 8, 2022

مریم نواز نے ایک اور ٹویٹ میں کہا کہ مری میں بے یارو مددگار برف میں دھنسے رہنے والے پورے کے پورے خاندانوں کی موت کے دردناک واقعے نے دل ہلا کے رکھ دیا ہے۔حکومت کو کوسنے کا کوئی فائدہ نہیں، یہ بہت پہلے مرچکی ہے۔  انہوں نے دعا کی کہ  اللہ تعالیٰ مرحومین، ان کے ورثا اور پاکستان پر خصوصی رحم فرمائے۔

مری میں بے یارو مددگار برف میں دھنسے رہنے والے پورے کے پورے خاندانوں کی موت کے دردناک واقعہ نے دل ہلا کے رکھ دیا ہے۔حکومت کو کوسنے کا کوئی فائدہ نہیں کیونکہ یہ مردہ ضمیر حکومت بہت پہلے مر چکی ہے۔ اللّہ تعالی مرحومین اور انکے لواحقین اور پاکستان پر اپناخصوصی رحم فرمائے۔ آمین ???

— Maryam Nawaz Sharif (@MaryamNSharif) January 8, 2022

ایک اور ٹوئٹ میں مریم نواز  کا کہناتھا کہ حکومتوں کا کام صرف سیاح گننا نہیں ان کیلئے  پیشگی انتظامات کرنا ہے، شہباز شریف کی خدمت کا مذاق اُڑانے والا اپنے محل میں بیٹھا حکومت بچانے کی کوششوں میں مصروف ہے۔ انہوں نے کہا   یہ اموات برفباری سے نہیں، حکومتی غفلت سے ہوئی ہیں۔

حکومتوں کا کام صرف سیاح گننا نہیں بلکہ ان کے لیے پیشگی انتظامات اور حفاظتی اقدامات کرنا ہے۔ شہباز شریف کے بوٹوں اور خدمت کا مذاق اُڑانے والا اپنے محل میں بیٹھا اپنی گرتی ہوئی حکومت بچانے کی کوششوں میں مصروف ہے۔ یہ اموات برفباری سے نہیں، حکومتی غفلت سے ہوئی ہیں۔

— Maryam Nawaz Sharif (@MaryamNSharif) January 8, 2022

پاکستان مسلم لیگ (ن) کے صدر اور قائد حزب اختلاف شہباز شریف نے مری اور گلیات میں اموات پر رنج  اور افسوس کا اظہار کرتے ہوئے کہا کہ مری واقعہ انتظامی نااہلی اور مجرمانہ غفلت کا دردناک واقعہ ہے، یہ حکومت کی انتظامی صلاحیت کا عالم ہے، یہ ہلاکتیں نہیں، شہریوں کے قتل کے مترداف ہے، شہریوں کو بچانے اور محفوظ مقامات تک پہنچانے کی کوشش کیوں نہ ہوئی ؟ حکومت ایک ہزار گاڑیوں کے انتظام کی بھی صلاحیت نہیں رکھتی، سیاح اتنی بڑی تعداد میں جا رہے تھے تو حکومت کو کیوں پتہ نہ چلا ؟ انتظامیہ کہاں سوئی ہوئی تھی؟ پیشگی انتظامات کیوں نہ کئے گئے؟۔

انہوں نے مزید کہا کہ  جو حکومت رش میں پھنسے شہریوں کو نہیں بچاسکتی وہ مہنگائی کی دلدل سے عوام کو کیسے نکال سکتی ہے ؟ حکومت ایک ہزار گاڑیوں کا مسئلہ حل نہیں کرسکتی، ملک کے بڑے اور سنگین مسائل سے کیسے نمٹ سکتی ہے ؟ عمران نیازی میں تو اخلاقی جرات نہیں، کم ازکم اس سنگین مجرمانہ غفلت کے ذمہ دار وزیروں کو ہی برخاست کیا جائے، اس خون ناحق پر کسی کو تو ذمہ دار ٹھہرایا جائے۔ 

شہباز شریف نے کہاکہ  سیاحت میں اضافے کا حکومتی پراپیگنڈہ سفاکی اور سنگ دلی کی انتہاء ہے، حکومت مری اور گلیات میں ٹریفک انتظامات کرنے کے قابل بھی نہیں۔

اپوزیشن لیڈر پنجاب اسمبلی حمزہ شہباز شریف  نے بھی مری کی صورتحال پر بیان میں کہاکہ  برف میں پھنسنے کے باعث مری میں ابھی تک 20 سے زائد افراد کے جاں بحق ہونے کی اطلاعات ہیں ، انہوں نے سوگوار خاندانوں کے ساتھ اظہار تعزیت کرتے ہوئے   کہا کہ اللہ تعالی ان خاندانوں کو صبر جمیل عطا کرے ۔ 

حمزہ شہباز نے  حکومت پر تنقید کرتے ہوئے کہا کہ  رات کو لوگ سردی سے ٹھٹھر کر مرتے رہے اور پنجاب حکومت اور انتظامیہ نیند کے مزے لوٹتی رہی۔ ایک لاکھ سے زائد گاڑیوں کو مری میں داخلے کی اجازت ہی کیوں دی گئی۔ اگر حکومت گاڑیوں کا داخلہ روکنے میں ناکام رہی تو پھر پھنسے ہوئے افراد کو ریسکیو ہی کر لیا جاتا۔

اپوزیشن لیڈر پنجاب اسمبلی حمزہ شہباز  کاکہنا تھا کہ کیا وزیراعلی کا ہیلی کاپٹر عوام کی جانیں بچانے کے لئے استعمال نہیں ہو سکتا تھا۔ پوری انتظامی مشینری کو انسانی جانیں بچانے پر کیوں نہیں لگایا گیا،  رات جب ہلاکتوں کی خبریں آنا شروع ہو گئیں تب بھی نااہل حکومت کے کان پر جوں نہ رینگی۔ 

انہوں نے کہا کہ حکومت کی سنگ دلی،  بے حسی اور نااہلی کے باعث یہ انسانی سانحہ ہوا ہے۔اس سے قبل ڈینگی کے سلسلے میں بھی نا اہلی کے باعث 26 ہزار سے زائد کیسز اور 150 کے قریب ہلاکتیں ہوئیں۔  یہ حکومت لوگوں کی جان کا تحفظ کرنے میں پوری طرح سے ناکام ہو چکی ہے، کٹھ پتلی وزیراعلی اور اسلام آباد میں بیٹھ کر ڈوریں ہلانے والا وزیراعظم اس المیے کے ذمہ دار ہیں۔لوگوں کی جان بچانے میں ناکامی پر ان تمام افراد کو استعفی دینا چاہئیے ۔ 

پاکستان پیپلزپارٹی کے چیئرمین بلاول بھٹو زرداری کا مری میں سرد موسم سے سیاحوں کے جاں بحق ہونے پر اظہار افسوس  کیا ہے ۔ بلاول بھٹو زرداری  نے مری میں جاں بحق ہونے والے سیاحوں کے لواحقین سے اظہار تعزیت کرتے ہوئے کہا کہ مری میں افسوس ناک سانحے پر پورا ملک سوگوار ہے، بہتر ہوتا کہ مری میں سیاحوں کو سنگین صورت حال سے آگاہ کیا جاتا تاکہ ایسا سانحہ رونما نہ ہوتا۔  بلاول بھٹو زرداری نے اپیل کی کہ انتظامیہ سیاحوں کی فی الفور مدد کے لیے ہنگامی اقدامات کرے ۔ 

پاکستان پیپلزپارٹی کی سینیٹر شیری رحمان نے بھی اس افسوس ناک واقعے پر لواحقین  سے اظہار تعزیت کی ہے ۔ 

Heartbreaking ? updates from Murree about the loss of 19 precious lives due to cars being trapped in heavy snowfall and traffic blocks. Govts surely need to be more vigilant about the flood of tourists on the Galiat routes in extreme weather. 1/2

— SenatorSherryRehman (@sherryrehman) January 8, 2022

واضح رہے کہ مری میں سیاحوں کے شدید رش اور برفباری کی وجہ سے ہزاروں گاڑیاں پھنس گئیں جبکہ 21  افراد اب تک جاں بحق ہو چکے ہیں ۔