مری کا نام تبدیل کرنے کی تجویز 

تفصیلات کے مطابق مری میں انتطامی امور کو بہتر بنانے کیلئے پنجاب حکومت نے مزید اقدامات کرنے کا فیصلہ کرلیا ۔  وزیراعلیٰ پنجاب عثمان بزدار نے مری کو ضلع کوہسار بنانے کے قیام اور کوہسار ڈویلپمنٹ اتھارٹی کے لیے ہدایات جاری کردیں ۔

 وزیراعلی پنجاب نے مری کو ضلع کا درجہ دینے اور کوہسار ڈویلپمنٹ اتھارٹی کے قیام کے لئے اقدامات کا حکم دیا ہے ۔  ضلع کوہسار کی حد بندی کے لئے بورڈ آف ریونیو سے سفارشات طلب کرلی گئی ہیں ۔ اس ضمن میں  کون سے علاقے نئے ضلع میں شامل  ہوں گے۔، چیف سیکرٹری اور سینئر ممبر بورڈ آف ریونیو اپنی سفارشات دیں گے۔ تجویز کردہ ضلع کوہسار کے علاقے کی حدود خیبر پختونخوا تک ہوگی ۔ پنڈی کے کچھ علاقے بھی اس ضلع میں شامل ہوسکتے ہیں ۔

وزیراعلی ٰ پنجاب  نے مقامی ارکان اسمبلی سے بھی مشاورت کی ہدایت کر دی ہے ۔ اس سیاحتی مقام کے لئے کوہسار ڈویلپمنٹ اتھارٹی قائم کی جائے گی۔ کوہسار ڈویلپمنٹ اتھارٹی سیاحتی مقام پر تعمیر و ترقی کی ذمہ دار ہوگی ۔ کوہسار ڈویلپمنٹ اتھارٹی ریسکیو اور ریلیف آپریشن کی بھی ذمہ دار ہوگی ۔ سیاحتی ضلع کو مشینری خریدنے کے لئے خصوصی فنڈز فراہم کیے جائیں گے۔