کورونا کا پھیلاؤ، این سی او سی کی جانب سے دوران پرواز کھانے کی فراہمی  پر پابندی 

تفصیلات کے مطابق نیشنل کمانڈ اینڈ آپریشن سینٹر ( این سی او سی ) کا اجلاس ہوا ، جس میں کورونا کی بڑھتی صورتحال اور اضافے کی صورت میں مجوزہ بندشوں پر تبادلہ خیال کیا گیا ۔ اجلاس میں صوبوں خصوصا سندھ کے ساتھ بڑھتی وباء کے کنٹرول کے لیے رابطے بڑھانے کا فیصلہ کیا گیا ، موجودہ این پی آئیز کا بھی جائزہ لیا گیا۔ 

این سی او سی کی جانب سے تعلیمی اداروں، عوامی اجتماعات اور شادی ہالز میں این پی آئیز کے حوالے سے 17 جنوری کو خصوصی اجلاس طلب کر لیا گیا ہے جس میں صوبائی وزرائے تعلیم و صحت شرکت کریں گے۔

این سی او سی کی جانب سے دوران پرواز کھانے کی تقسیم پر بھی پابندی عائد کی جائے گی ، سول ایوی ایشن کو دوران پرواز ماسک کا استعمال اور دیگر این پی آئیز پر عمل درآمد یقینی بنانے کی ہدایت دی جائے گی ۔  این سی او سی  کے فیصلے کے مطابق 17 جنوری سے پبلک ٹرانسپورٹ میں بھی سنیکس اور کھانا تقسیم کرنے پر پابندی ہوگی۔

واضح رہے کہ ملک  میں کورونا کی پانچویں لہر زور پکڑنے لگی ہے اور ایک بار پھر یومیہ کیسز اور اموات میں اضافہ دیکھنے میں آیا ہے ۔ 

نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  پاکستان  میں گزشتہ 24 گھنٹوں کے دوران 4مریض انتقال کرگئے جس کے بعد اموات کی مجموعی تعداد 29ہزار 003 تک پہنچ گئی ہے ۔

ملک میں آج کورونا کے 4ہزار سے زائد کیسز رپورٹ ہوئے ہیں ۔ جس کے بعد  ملک میں  کورونا کیسز کی مجموعی تعداد 13 لاکھ 20ہزار 120 ہوگئی ہے ۔ 

 ملک بھر میں  چوبیس گھنٹے کے دوران  52ہزار522ٹیسٹ کئےگئے ہیں ۔ پاکستان میں کوروناکے709مریضوں کی حالت تشویشناک ہے ۔