چین اور روس کا چاند پرمشترکہ خلائی اسٹیشن قائم کرنے کا معاہدہ

تفصیلات کے مطابق روس خلا میں برتری کی دوڑ میں امریکہ  کا مقابلہ کرنے کے لیے اپنی خلائی طاقت کو جدید اور مزیدمستحکم  بنانا چاہتا ہے اور اس منصوبے سے دونوں ممالک مستفید ہوسکیں گے ۔ غیر ملکی خبررساں ادارے  کے مطابق  روسی خلائی ایجنسی روسکوموس  نے تصدیق کی ہے کہ اس سلسلے میں چینی خلائی ایجنسی کے ساتھ مفاہمت کی یادداشت پر دستخط ہوگئے ہیں۔ روسی خلائی ایجنسی کی جانب سے جاری بیان میں کہا گیا ہے کہ تحقیقاتی تنصیبات چاند کی سطح یا اس کے مدار میں قائم کی جائیں گی،بیان کے مطابق  مفاہمتی  یاداشت  کے تحت چاند کی سطح یا مدار میں قائم خلائی اسٹیشن تجرباتی اور تحقیقی سہولیات کی فراہمی کے لیے تیار کیا جائے گا۔ یہ خلائی اسٹیشن خلائی تحقیق میں دلچسپی رکھنے والے دیگر ممالک کے لیے بھی دستیاب ہوگا۔

چین نے اسے اپنا بین الاقوامی خلائی تعاون کا سب سے اہم پروجیکٹ قرار دیتے ہوئے کہا ہے کہ پروجیکٹ دلچسپی رکھنے والے تمام ملکوں اور عالمی شراکت داروں کے لیے کھلا ہے ۔

تاہم ابھی یہ واضح نہیں کیا گیا کہ یہ خلائی اسٹیشن کب تیار ہوگا اور اور اس پر کب کام شروع کیا جائے گا ۔

یاد رہے کہ روس نے 1961 میں سوویت دور میں پہلی بار خلا میں کسی انسان کو بھیجا تھا،    اس کے برعکس   امریکی خلائی ایجنسی ناسا نے 1968 میں  پہلی پرواز خلا میں بھیجی  ۔ تاہم آنے والے دور میں روس  چاند اور مریخ کے منصوبوں کے حوالے سے امریکا اور چین سے پیچھے رہ گیا ہے۔

خیال رہے کہ چین نے اپنے خلائی پروگرام پر گذشتہ چند سالوں سے بہت زیادہ توجہ دے رہا ہے اور چین امریکا کے بعد خلائی پروگرام میں سرمایہ کاری کرنے والا دنیا کا سب سے بڑا ملک بن چکا ہے جو روس اور جاپان سے بھی زیادہ عسکری اور سویلین مشن خلا میں بھیج رہا ہے۔

دوسری جانب  امریکی خلائی ایجنسی ناسا   کی نگاہیں مریخ پر جمی ہیں اور  وہ مریخ پر  ایک ممکنہ انسانی مشن کرنے کا ارادہ رکھتا ہے ، اگر چہ ابھی اس کی منصوبہ بندی  ابتدائی مرحلے میں ہے۔