رنبیر کپور کے بعدسنجے لیلابھنسالی بھی کورونا وائرس کا شکار ہوگئے

تفصیلات کے مطابق بالی ووڈ کے معروف ڈائریکٹر، پروڈیوسر، اسکرین رائٹر اور موسیقار سنجے لیلا بھنسالی کا فلم"  گنگو بائی کوٹھے والی"  کے سیٹ پر لیا گیا کورونا وائرس ٹیسٹ مثبت آگیا ہے جس کے بعد فلم کی شوٹنگ ملتوی کردی گئی ہے۔  بھارتی میڈیا کے مطابق سنجے لیلا بھنسالی نے ٹیسٹ مثبت آنے کے بعد خود کو قرنطینہ کرلیا ہےجبکہ فلم کے سیٹ پر موجود تمام کاسٹ اور ٹیم کا بھی کورونا ٹیسٹ کروایا جارہا ہے اور ان سب کو بھی آئسولیشن میں جانے کو کہا گیا ہے ۔

گزشتہ روز اداکار رنبیر کپور کا ٹیسٹ بھی  مثبت  آیا تھا ۔ ڈائریکٹر سنجے لیلا بھنسالی کی اس فلم میں  رنبیر کپور  کے ہمراہ    عالیہ بھٹ بھی  مرکزی کردار ادا کررہی ہیں، اور یہ فلم اس سال 30 جولائی کو ریلیز ہوگی۔

اس سے قبل بھی بھارتی فلم انڈسٹری کی متعدد شکصیات کا کورونا ٹیسٹ مثبت آچکا ہے ۔ ماضی میں کورونا میں مبتلا ہونے والی بالی وڈ شخصیات میں میگا اسٹار امیتابھ بچن، ان کے بیٹے ابھیشیک بچن، بہو ایشوریا رائے، پوتی ارادھیا بچن، اداکارہ ملائیکا اروڑا، ارجن کپور، اداکارہ سارا خان، سنی دیول، ورون دھون، نیتو کپور ،  کریتی سنن  سمیت دیگر شخصیات شامل ہیں۔یہ تمام شخصیات کورونا سے ایک سے ڈیڑھ مہینے کے درمیان صحت یاب ہوگئی تھیں ۔