سینیٹ الیکشن سے قبل پی ٹی آئی کو جہانگیر ترین کی یاد ستانے لگی

تفصیلات کے مطابق وزیراعظم عمران خان کی زیرصدارت حکومتی پارلیمانی پارٹی کا اجلاس ہوا جس میں  ارکان نے خوب شکوے کیے،راجہ ریاض نے سینیٹ انتخابات کے لیے جہانگیر ترین کو پنجاب میں کمیٹی  چیئرمین بنانے کا مطالبہ کر دیا اور کہا کہ پارٹی کے لیے جہانگیر ترین کی خدمات کو بھلایا نہیں کیا جا سکتا، جہانگیر ترین کو پنجاب میں کمیٹی  چیئرمین بنایا جائے۔

وزیراعظم عمران خان کی زیر صدارت اجلاس میں ارکان نے کہا کہ آٹا،دال، چینی کچھ بھی عوام کو نہیں مل رہا،حفیظ شیخ ماضی میں بھی یہی باتیں کرتے تھے جبکہ وزیراعظم عمران خان کے مشیر، وزیر سبز باغ دیکھا رہے ہیں۔اجلاس میں نور عالم خان نے وزراء کے احتساب کا مطالبہ کر دیا جبکہ  اجلاس میں نجیب ہارون نے کراچی پلان پر تنقید کرتے ہوئے کہا کہ 2023 تک کچھ نہیں ہو گا،کے فور منصوبہ مکمل ہو گا نہ نالے صاف ہوں گے۔ حکومتی پارلیمانی پارٹی  کے اجلاس میں ارکان نے سندھ  میں پارٹی تنظیم سازی  کو بھی تنقید کا نشانہ بنایا۔

خیال رہے کہ چینی سکینڈل کی تحقیقات میں جہانگیر ترین کا نام سامنے آیا تھا اور رپورٹ میں کہا گیا تھا کہ جہانگیر ترین سمیت حکومتی اور اپوزیشن کے کئی سیاستدانوں کی شوگر ملز ناجائز منافع کمارہی ہیں۔