پنجاب کے مختلف شہروں میں ٹریفک حادثات ، 7 افراد جاں بحق

تفصیلات کے مطابق پہلا  افسوس ناک حادثہ پنجاب کے شہر اوکاڑہ میں پیش آیا جہاں دیپالپور روڈ پر ٹرک اور رکشہ میں تصادم کے نتیجے میں    1بچے سمیت 3افراد جاں بحق ہوگئے ۔ جاں بحق ہونے والوں میں میاں بیوی اور 10سالہ بیٹا شامل ہیں جبکہ دو خواتین سمیت  4افراد زخمی ہوگئے ۔ واقعے کی اطلاع ملتے ہی ریسکیو  1122 کی ٹیمیں موقع  پر پہنچ گئیں اور جاں بحق اور زخمیوں کو ہسپتال منتقل کردیا۔

دوسرا خوفناک حادثہ ضلع ساہیوال چیچہ وطنی  میں 15 موڑ بورے والا روڈ  پر پیش آیا،  جہاں تیزرفتار مزدا ٹرک کھڑی  ٹریکٹر ٹرالی  کے پیچھے سے  ٹکرا گیا جس  کے نتیجے میں 4 افراد جان کی بازی ہار گئے ۔ ریسکیو کی ٹیمیں موقع پر پہنچ گئیں اور جاں بحق افرادکو ہسپتال منتقل کردیا۔ریسکیو کے مطابق  حادثہ مزدا ٹرک ڈرائیور کو نیند آنے کے باعث پیش آیا۔

واضح رہے کہ عالمی ادارہ صحت کے مطابق پاکستان میں سالانہ 35 ہزار لوگ سڑک حادثات  میں جاں بحق ہوجاتے ہیں، جبکہ 50 ہزار سے زائد افراد زخمی اور عمر بھر کی معذوری سے دوچار ہوتے ہیں۔ حکومتی رپورٹ کے مطابق پاکستان میں ہر پانچ منٹ کے بعد ٹریفک حادثہ پیش آتا ہے، جس میں کوئی نہ کوئی شخص زخمی یا  جاں بحق ہوجاتا ہے۔