پاکستان کا بھارت میں اقلیتوں کے خلاف مظالم پر اظہارِ تشویش،اقلیتوں کے بنیادی حقوق کے تحفظ کا مطالبہ

اسلام آباد: پاکستان نے بھارت میں اقلیتوں کے خلاف مظالم پر تشویش کا اظہار کرتے ہوئے ان کے بنیادی حقوق کے تحفظ کا مطالبہ کیا ہے۔

تفصیلات کے مطابق  ترجمان دفتر خارجہ کا کہنا ہے کہ کرسمس کے موقع پر توڑ پھوڑ اور مسلمانوں کے خلاف تشدد کے واقعات قابلِ مذمت ہیں۔

ترجمان دفتر خارجہ کے مطابق بھارت میں مسلمانوں کے گھروں کی مسماری کے واقعات میں اضافہ ہو رہا ہے۔

ترجمان نے محمد اخلاق قتل کیس کی مثال دیتے ہوئے کہا کہ اس میں ریاست نے ملزمان کو بچانے کی کوشش کی، جس نے مسلمانوں میں عدم تحفظ کے جذبات کو مزید بڑھا دیا ہے۔

ترجمان دفتر خارجہ نے کہا کہ عالمی برادری کو اقلیتوں پر ظلم و ستم کے واقعات کا نوٹس لینا چاہئے، عالمی برادری بھارت میں اقلیتوں کے بنیادی حقوق کے تحفظ کیلئے مناسب اقدامات کرے۔

خیال رہے کہ بھارتی میڈیا نے رپورٹ کیا تھا کہ 25 دسمبر کو بھارت کے مختلف حصوں میں کرسمس کی تقریبات کو ہندوتوا سے منسلک انتہا پسند عناصر کی جانب سے نشانہ بنایا گیا، متعدد مقامات پر مسیحی برادری کی مذہبی تقریبات میں مداخلت کی گئی اور سجاوٹ کو نقصان پہنچایا گیا۔