ٹک ٹاک کو پاکستان میں ایک بار پھر بند کر دیا گیا۔

تفصیلات کے مطابق آج پشاور ہائیکورٹ کی جانب سے دیئے گئے حکم کی پیروی کرتے ہوئے  پی ٹی اے(پاکستان ٹیلی کمیونیکیشین) نے ملک میں انٹرٹینمنٹ ایپ ٹک ٹاک کو پوری طرح بند کر دیا ہے ۔ جس کے بعد صارفین ایپ استعمال کرنے سے قاصر ہیں۔

In respectful compliance to the orders of the Peshawar High Court, PTA has issued directions to the service providers to immediately block access to the TikTok App. During the hearing of a case today, the PHC has ordered for the blocking of App.

— PTA (@PTAofficialpk) March 11, 2021

یاد رہے آج پشاورہائیکورٹ  میں   ٹک ٹاک کے خلاف دائر درخواست پر چیف جسٹس قیصررشید خان نے سماعت  کی تھی ،  ڈی جی پی ٹی اے،  ڈپٹی اٹارنی جنرل اور درخواست گزار وکیل نازش مظفر اور سارہ علی عدالت میں پیش ہوئے  تھے۔دوران سماعت چیف جسٹس نے کہا کہ  ٹک ٹاک پر جو ویڈیوز  آپ لوڈ ہوتی ہے یہ ہمارے معاشرے کو قابل قبول نہیں ہے۔ چیف جسٹس کا ڈی جی پی ٹی اے سے استفسار کیا کہ ٹک ٹاک ایپلی کیشن بند کرنے سے ان کو نقصان ہوگا؟ جس پر ڈی جی پی ٹی اے  نے جواب  دیا کہ جی ان کو نقصان ہوگا۔ ہم نے ٹک ٹاک کے عہدیداروں کو درخواست دیا ہے لیکن ابھی مثبت جواب نہیں آیا۔

چیف جسٹس قیصر رشید خان نے کہا کہ  جب تک ٹک ٹاک کے عہدہ دار آپ کی درخواست پر عمل نہیں کرتے،  غیر اخلاقی مواد روکنے کے لئے آپ کے ساتھ تعاون  نہیں کرتے اس وقت تک ٹک ٹاک بند کیا جائے۔ ٹک ٹاک سے سب سے زیادہ نوجوان متاثر ہورہے ہیں ، ٹک ٹاک کے بارے میں جو رپورٹ مل رہی ہے یہ افسوسناک ہے۔ عدالت نے حکم جاری  کرتے ہوئے کہا کہ جب تک آپ کی درخواست پر عمل نہیں کرتے اس کو بند کیا جائے۔

خیال رہے کہ پاکستان ٹیلی کمیونی کیشن اتھارٹی نے گزشتہ برس 9 اکتوبر کو فحش مواد کو نہ ہٹائے جانے پر ٹک ٹاک کو ملک بھر میں بند کردیا تھا۔