سپریم کورٹ نے ہنگامی حالت کے بغیر آرڈیننس کے اجراء کو آئین سے انحراف قرار دیدیا

تفصیلات کے مطابق  سپریم کورٹ نے آرڈیننس کے اجراء سے متعلق تاریخی فیصلہ سنا دیا، سپریم کورٹ نے ہنگامی حالت کے بغیر آرڈیننس کے اجراء کو آئین سے انحراف قرار دیدیا، آئینی شرائط کے بغیر صدر و گورنرز آرڈیننس کا نفاز نہیں کر سکتے۔عدالت عظمی نے تحریری فیصلہ جاری کردیا ہے، جسٹس قاضی فائز عیسی نے 30 صفحات پر مشتمل فیصلہ تحریر کیا۔

سپریم کورٹ نے فیصلے میں کہا ہے کہ   آئین کے ہر لفظ پر سختی سے عمل ہونا چا ہیئے،  آرڈیننس جاری کرنے کیلئے آئین میں طریقہ کار دیا گیا ہے،   آئینی شرائط کے بغیر صدر اور گورنرز آرڈیننس نافذ نہیں کر سکتے،  آرڈیننس کچھ ماہ بعد ختم ہو جاتے ہیں ،آرڈیننس کے ذریعے طویل مدتی حقوق اور ذمہ داریاں دینے سے گریز کرنا چاہیئے ۔

فیصلے میں کہا گیا ہے کہ  جمہوری ملک میں عوام منتخب نمائندو ں کے ذریعے اپنی راے کا اظہار کرتے ہیں ،  قانون سازی کے عمل میں یقینی بنایا جائے کہ عوام کے حقوق پامال نہیں ہوئے۔ انکم سپورٹ لیوی ایکٹ 2013 کی سینٹ سے منظوری نہیں لی گئی، عوامی نمائندوں کے ذریعے ہونے والی قانون سازی آئینی تقاضا ہے۔

فیصلے میں مزید کہا گیا ہے کہ  ملک میں نمائندہ جمہوریت عوام کو متحد اور خیر سگالی کو جنم دیتی ہے، پارلیمنٹ کے ذریعے ہونے والی قانون سازی سے عوام با اختیار اور وفاق مضبوط ہو تا ہے،  آئین کی خلاف ورزی عوام کی بے توقیری ہے تباہ کن ہے۔