پاکستان میں بھارتی میزائل گرنے کے واقعے پر چین کا رد عمل آگیا

بیجنگ : پاکستان میں بھارتی میزائل گرنے کے واقعے پر   چین کا ردعمل آگیا ،  چینی وزارت خارجہ  نے دونوں ممالک پر جلد بات چیت اور مذاکرات کرنے پر زور دیا ہے۔

نجی ٹی وی " اے آر وائی نیوز " کے مطابق چینی وزارت خارجہ نے کہا   کہ پاکستان میں بھارتی میزائل گرنے کا واقعہ علم میں ہے، دونوں ممالک کو معاملے پر بات کرنی اور جائزہ لینا چاہیے،  بھارت اور پاکستان مذاکرات اور میزائل گرنے کی تحقیقات کریں اور واقعے سے متعلق معلومات کو شیئرکیا جائے ساتھ ہی رپورٹنگ طریقہ کار طے کیا جائے تاکہ ایسے واقعہ پھر نہ ہو۔

یاد رہے اس سے قبل امریکا نے پاکستان میں بھارتی میزائل گرنے کے معاملے پر تبصرے سے انکار کردیا تھا ، اس حوالے سے ترجمان امریکی محکمہ خارجہ نیڈ پرائس نے کہا تھا کہ بھارتی وزارت دفاع نے واقعے کو حادثہ قراردیا ہے، میزائل گرنے کے معاملے پر اس سے زیادہ کچھ نہیں کہہ سکتے۔