وزیراعظم عمران خان کا سوات میں جلسے سے خطاب

وزیر اعظم عمران خان نے سوات میں جلسے سے خطاب کرتے ہوئے کہا کہ آج میرے لیے بہت خوشی کا دن ہے اور میں نے صبح اٹھ کر اللہ تعالیٰ کا شکریہ ادا کیا۔ ہم تین سال سے اسلاموفوبیا کے خلاف قرارداد کی منظوری کے لیے کوششیں کر رہے تھے۔

ان کا کہنا تھا کہ ہم نے اسلامو فوبیا کے خلاف طویل جدوجہد کی۔ اسلامو فوبیا کے خلاف قرارداد خوش آئند ہے،ہماری کوششیں رنگ لائیں اور اقوام متحدہ میں اسلامو فوبیا کے خلاف قرارداد منظور ہو گئی، پاکستان کی قرارداد 57 ملکوں نے مل کر اقوام متحدہ میں پیش کی۔

عمران خان نے کہا ہے کہ اسلامو فوبیا کا سب سے زیادہ نقصان مغربی ممالک میں موجود مسلمانوں کو ہونا تھا لیکن اقوام متحدہ میں اسلامو فوبیا پر قرارداد منظور ہونا امت مسلمہ کی بڑی کامیابی ہے،نائن الیون کے بعد اسلام اور دہشت گردی کو جوڑ دیا گیا۔

انہوں نے کہا ہے کہ مولانا فضل الرحمان نے اسلامو فوبیا پر کبھی بات نہیں کی اور وہ ہر حکومت میں شامل ہوتے رہے،مولانا فضل الرحمان نے دین کے نام پر سیاست کی ہے ۔

ان کا مزید کہنا تھا کہ نواز شریف پرچیاں لے کر امریکی صدر کے سامنے بیٹھے تھے وہ ایک پرچی اسلامو فوبیا کے حوالے سے بھی ساتھ رکھ لیتے،کیا کبھی سابق حکمرانوں نے عالمی سطح پر اسلامو فوبیا پر بات کی ؟