سیکرٹری جنرل اقوام متحدہ کا او آئی سی وزرائے خارجہ اجلاس میں پیغام

تفصیلات کے مطابق اپنے پیغام میں سیکرٹری جنرل اقوام متحدہ انتونیو گوئترس نے کہا کہ  پاکستان  میں او آئی سی اجلاس کے انعقاد پرمجھے خوشی ہے ،  او آئی سی  اور اقوام متحدہ کے اغراض و مقاصد قریب تک ہیں ، او آئی سی دنیا میں امن ، سلامتی اور ہم آہنگی کے فروغ کیلئے اہم موثر کردار ادا کر رہی ہے۔

سیکرٹری جنرل اقوام متحدہ نے کہا کہ  ترقی پذیر ممالک کو سماجی ،عدم مساوات سمیت متعدد اہم چیلنجز کا سامنا ہے ، دونوں تنطیمیں امن و استحکام کیلئے کوشاں ہیں ،مجھے خوشی ہے کہ دونوں تنظیمیں انسداد دہشتگردیاور مذہبی رواداری  سمیت  متعدد اہداف پر مشترکہ حکمت عملی اپنائے ہوئے ہیں ۔

واضح رہے کہ اسلامی تعاون تنظیم (او آئی سی) کے وزرائے خارجہ کی کونسل (سی ایف ایم) کا 48 واں اجلاس جاری ہے ، اجلاس میں 57  ممالک کے وزرائے خارجہ موجود ہیں، ان کے علاوہ صدر پاکستان ڈاکٹر عارف علوی، وزیراعظم عمران خان، وفاقی وزرا اور اہم شخصیات بھی اجلاس میں شریک ہیں۔

او آ ئی سی کیا ہے ؟ 

او آئی سی اقوام متحدہ کے بعد دُنیا کی دوسری بڑی بین الاقوامی تنظیم ہے اور دنیا بھر کے 57 مسلم ممالک اس کے رکن ہیں۔ او آئی سی کے فیصلوں پر عملدرآمد کا جائزہ لینے کیلئے ہر سال اجلاس ہوتا ہے ۔ پاکستان ،سعودی عرب، ترکی،افغانستان ، ایران ، انڈونیشیا ،ملائشیا،اردن،کویت ، لبنان ، لیبیا، الجزائر،چاڈ، مصر، یمن،سوڈان ،صومالیہ،فلسطین ،مراکش اور نائیجیریا بنیادی ارکان ہیں۔

اسلامی تعاون تنظیم کی وزرائے خارجہ کونسل کے 47 اجلاس منعقد ہو چکے ہیں اور پاکستان اس سے پہلے 1970، 1980، 1993 اور 2007 میں چار بار او آئی سی اجلاسوں کی میزبانی کر چکا ہے۔