آرمی چیف کی ازبک نائب وزیر خارجہ سے ملاقات ،دوطرفہ تعاون پر تبادلہ خیال

تفصیلات کے مطابق ازبکستان کے نائب وزیر خارجہ فرقت صدیکووف نے بری فوج کے سربراہ جنرل قمر جاوید باجوہ سے  ملاقات میں باہمی دلچسپی کے امور علاقائی سلامتی کی صورتحال اور مختلف شعبوں میں دوطرفہ تعاون پر تبادلہ خیال کیا ۔

بری فوج کے سربراہ نے کہا کہ پاکستان ازبکستان کے ساتھ اپنے تعلقات کو انتہائی اہمیت دیتا ہے جو مشترکہ مذہب اقدار جیوسٹرٹیجک اہمیت باہمی فائدے کے امکانات اور بڑھتے ہوئے اقتصادی اور دفاعی تعاون پرمبنی ہیں۔

فریقین نے خطے میں امن وسلامتی کی کوششوں سمیت دوطرفہ تعلقات کومزید فروغ دینے کی خواہش کااعادہ کیا۔

ازبک نائب وزیر خارجہ  نے علاقائی استحکام میں پاکستان کے کردار کو سراہتے ہوئے ہر سطح پر پاکستان کے ساتھ سفارتی روابط میں بہتری کیلئے کردار ادا کرنے کا عزم ظاہر کیا ۔ انہوں نے خصوصا اسلامی تعاون تنظیم کے وزرائے خارجہ کونسل کے اڑتالیسویں اجلاس کی میزبانی پر پاکستان کی کوششوں کو سراہا۔