امریکا نے روس، شمالی کوریا پر نئی پابندیاں عائد کردیں

تفصیلات کے مطابق امریکی حکومت کی جانب سے کہا گیاہے کہ  پابندیوں کے شکار افراد، آرگنائزیشنز شمالی کوریا میزائل پروگرام کیلئے حساس آلات فراہم کررہی تھیں، پابندیاں شمالی کوریا کے میزائل پروگرام کو آگے بڑھنےسے روکنےکیلئے کوششوں کا حصہ ہیں ۔

امریکا نے پابندیاں عائد کرتے ہوئے کہا کہ روس عالمی سطح پر قابل تشویش پروگراموں میں پیشرفت کیلئے منفی کردار ادا کر رہا ہے۔

یاد رہے کہ گزشتہ روز شمالی کوریا نے 2017کے بعد سب سے طاقتور میزائل تجربہ کیا تھا۔ 2017 میں شمالی کوریا نے ’ہاسانگ 12‘ کے نام سے آئی سی بی ایم کا تجربہ کیا تھا، جو 4500 کلومیٹر تک پہنچا تھا. 

 سال 2017 میں اس وقت کے امریکی صدر ڈونلڈ ٹرمپ سے مذاکرات کے بعد پیونگ یانگ نے دور تک مار کرنے والے بیلسٹک میزائل اور جوہری تجربوں کو معطل کر دیا تھا لیکن سنہ 2020 میں شمالی کوریا کے سربراہ کم جان ان نے اعلان کیا تھا کہ وہ اب اپنے اس وعدے کے پابند نہیں۔

واضح رہے کہ اقوام متحدہ نے شمالی کوریا پر بیلسٹک اور جوہری ہتھیاروں کے تجربوں پر پابندی عائد کر رکھی ہے اور گذشتہ بار ایسے تجربے کرنے پر شمالی کوریا کو سخت پابندیوں کا سامنا بھی کرنا پڑا تھا۔