امریکی واسرئیلی حملوں کے بعد ایران کی سعودی عرب، قطر، یو اے ای اور بحرین پر میزائل حملے

تہران: امریکی و اسرائیلی حملوں کے بعدایران نے جوابی کارروائی کرتے ہوئے اردن،عراق، یو اے ای،کویت ،بحرین اور قطر میںموجود امریکی اڈوں پر میزائل حملے کیے ہیں جبکہ سعودی دارالحکومت ریاض میں مبینہ طور پر ایران کی جانب سے حملہ کیا گیا ہے۔

عرب میڈیا کے مطابق ایران نے یواےای میں الدفرا ائیربیس، بحرین میں بحری ائیربیس کو نشانہ بنانےکی تصدیق کی ہے،جبکہ یو اےای کی سرکاری خبر ایجنسی کے مطابق ایرانی میزائل حملے میں ایک شخص ہلاک ہوا جبکہ یو اے ای نے متعدد ایرانی میزائلوں کو روک دیا۔

ایرانی حملوں پر ردعمل دیتے ہوئےیو اے ای کا کہنا ہے کہ یہ حملہ قومی خودمختاری اور بین الاقوامی قانون کی کھلم کھلا خلاف ورزی ہے، متحدہ عرب امارات اس جارحیت کا جواب دینے کا مکمل حق محفوظ رکھتا ہے۔

دوسری جانب سعودی وزارت خارجہ کی جانب سے خلیجی ممالک پر ایرانی میزائل حملوں کی شدید مذمت کی گئی ہے، جاری بیان میں کہا گیا ہے کہ ایران کی جانب سے بحرین، کویت،متحدہ عرب امارات، قطر اور اردن پر ایرانی حملے افسوسناک ہیں۔

بیان میں مزید کہا گیا ہے کہ ایران نے خلیجی ممالک پر حملہ کرکے ان کی خود مختاری پر حملہ کیا ہے ایران نے خلیجی ممالک پر حملہ کرکے بین الاقوامی قوانین کی بھی خلاف ورزی کی ہے اور سعودی عرب عرب ریاستوں کے ساتھ کھڑا ہے۔

بیان میں سعودی وزارت خارجہ نے عالمی برادری سے بھی مطالبہ کیا ہے کہ وہ ایرانی حملوں کی مذمت کرے اور خطے کے امن اور سلامتی کو خطرے میں ڈالنے پر ایران خلاف ورزیوں کا مقابلہ کرنے کے لیے ضروری اقدامات کرے۔

قبل ازیں ایرانی وزیرخارجہ عباس عراقچی نے عراقی ہم منصب سےگفتگو کرتے ہوئے کہا کہ ایران اپنا دفاع جاری رکھےگا، ایران ردعمل میں خطے میں تمام امریکی فوجی اڈوں کو نشانہ بنائےگا۔