ایم کیو ایم کا پیپلز پارٹی اورمسلم لیگ ن سے ہونے والا معاہدہ سامنے آگیا

ذرائع کے مطابق دونوں جماعتوں کے درمیان ہونے والے معاہدے کے متن کے مطابق پیپلزپارٹی لوکل گورنمنٹ ایکٹ میں ترامیم پر سپریم کورٹ کے فیصلے پر عمل کرے گی، سپریم کورٹ کے فیصلے کے مطابق ایکٹ میں ترامیم 30 دن میں سندھ اسمبلی سے منظور کرائی جائیں گی۔

ذرائع کا کہنا ہے کہ معاہدے کے تحت ایم کیو ایم کی سفارش پر کسی سیاسی فرد کو کے ایم سی کا ایڈمنسٹریٹر لگایا جائےگا، مقامی حکومتوں کے لیے فنڈز  کی تقسیم  این ایف سی ایوارڈ  2010  کے فارمولے کے تحت ہوگی۔

ذرائع کے مطابق معاہدے میں طے ہوا ہےکہ حیدرآباد میونسپل کارپوریشن کے لیے ایم کیو ایم 3 سرکاری افسران کے نام سندھ حکومت کو  بھیجےگی، سندھ حکومت بھیجے گئے 3 ناموں میں سے کسی ایک کو حیدرآباد کا ایڈمنسٹریٹر مقرر کرےگی، مقامی حکومتوں کی نئی حدود کا تعین باہمی مشاورت اور معاہدے کے تحت کیا جائےگا۔

ذرائع کا کہنا ہے کہ معاہدے کے متن کے تحت چیف سیکرٹری اور  آئی جی سندھ کا  تقرر قانون کے مطابق باہمی مشاورت اور معاہدے کے تحت کیا جائےگا، سندھ میں افسران کے تبادلے اور تقرریاں باہمی مشاورت سےکی جائیں گی، پیپلز پارٹی صوبائی حکومت کے لیے بھی ایم کیو ایم سے مشاورت اور تحریری معاہدہ کرےگی۔

دوسری جانب ن لیگ اور ایم کیو ایم کے درمیان بھی معاہدہ ہوگیا ہے، معاہدے پر سربراہ ایم کیو ایم خالد مقبول صدیقی، صدر مسلم لیگ ن شہباز شریف  نے دستخط کیے ہیں، معاہدے کے گواہوں میں خواجہ سعد رفیق بھی شامل ہیں۔

ذرائع کے مطابق دونوں جماعتوں کے درمیان ہونے والا معاہدہ 27 نکات پر مشتمل ہے، معاہدے کے تحت ایم کیو ایم پاکستان کو سندھ کےشہری علاقوں کابڑا اسٹیک ہولڈر تسلیم کیاجائےگا، سندھ کے شہری علاقوں سے متعلق فیصلوں میں ایم کیو ایم سے مشاورت کی جائےگی، آئندہ انتخابات شفاف مردم شماری کے بعد کرائے جائیں گے۔

ذرائع کا کہنا ہے کہ معاہدے کے متن کے مطابق  وفاقی ملازمتوں میں سندھ شہری کےکوٹے پر عمل درآمد کیا جائےگا، با اختیار بلدیاتی نظام سے متعلق سپریم کورٹ کے فیصلے پر عمل درآمد کیا جائےگا، جلعی اور جھوٹے مقدمات قانون کے مطابق ختم کیے جائیں گے، تنظیمی دفاتر کھولنے کے معاملے پر ایم کیو ایم کی مددکی جائےگی، ایم کیوایم پاکستان کی سرگرمیوں پر غیراعلانیہ پابندی ختم کی جائے گی۔