مستنصر حسین تارڑ نے بھی ادبی ایوارڈ لینے سے معذرت کر لی

تفصیلات کے مطابق ڈاکٹر اشو لال کے نام سے مشہور سرائیکی زبان کے شاعر و ادیب محمد اشرف کے بعد معروف ناول اور سفر نامہ نگار مستنصر حسین تارڑ نے بھی اکادمی ادبیات پاکستان سے ’کمال فن‘ ایوارڈ لینے سے معذرت کرلی۔

میڈیا ذرائع کے مطابق مستنصر حسین تارڑ کی جانب سے ایک مختصر ویڈیو پیغام جاری کیا گیا جس میں انہوں نے اکادمی ادبیات پاکستان سے ایوارڈ نہ لینے کا اعلان کیا۔

بتایا گیا ہے کہ سفر نامہ نگار مستنصر حسین تارڑ نے اکادمی ادبیات پاکستان کی جانب سے ایوارڈ دیے جانے کے ضوابط اور روایات کو توڑنے کی بنیاد پر ایوارڈ نہ لینے کا فیصلہ کیا۔

ان کا کہنا ہے کہ اکیڈمی نے اس مرتبہ ایوارڈ دینے کی 20 سے 21 سالہ روایات کو تبدیل کرتے ہوئے ’کمال فن‘ ایوارڈ محض دو شخصیات کو دینے کا اعلان کیا، جو کہ مضحکہ خیز بات ہے۔