اٹھارویں ترمیم کے بعد کوئی بھی آئین شکن اپنی مرضی کا نقب نہیں لگا سکتا: بلاول بھٹو 

پاکستان پیپلزپارٹی کے چیئرمین بلاول بھٹو زرداری نے  اٹھارویں ترمیم کو 12 سال مکمل ہونے کے موقعے پر اپنے پیغام میں کہا ہے کہ صدر آصف علی زرداری کی زیرِ قیادت حکومت کے دوران اٹھارویں ترمیم کی منظوری تاریخ ساز کارنامہ تھا۔ 

بلاول بھٹو زرداری نے کہا ہے کہ اٹھارویں آئینی ترمیم پاکستان کے جمہوریت پسند قوتوں کی عوام دوستی اور پاکستان پسندی کا مظہر ہے۔اٹھارویں آئینی ترمیم نے 1973ع کے متفقہ آئین کی روح کو بحال کیا ہے ،   جس کے تحت صدر کو حاصل تمام ایگزیکٹو اختیارات پارلیمان کو دیے گئے اور صوبوں کو ان کا حق ملا اور خیبرپختونخواہ کو اس کی شناخت دی گئی۔

چیئرمین بلاول بھٹو  نے کہا کہ  پاکستان کی عوام دستور کی پاسداری اور جمہوریت کا تسلسل چاہتے ہیں  لیکن آئین کو کاغذوں کا پلندہ قرار دینے والی سوچ چاہتی ہے کہ پاکستان افراتفری کا شکار رہے  تاکہ اس سوچ کے پیروکار چند افراد ختم نہ ہونے والی افراتفری و انتشار کے دوران اپنے مفادات سمیٹتے رہیں۔

ان کاکہنا تھا  کہ پیپلز پارٹی اٹھارویں ترمیم پر مکمل عملدرآمد کے لیئے سرگرم عمل ہے، حتمی فتح عوام ہی کی ہوگی۔

اٹھارویں ترمیم ہے کیا؟

اٹھارویں ترمیم کی منظوری سے 1973 کے آئین میں کئی تبدیلیاں کی گئیں ۔ جن میں صدر سے اسمبلیاں توڑنے کا اختیار واپس لینا، صوبہ سرحد کو خیبر پختونخوا کا نام دینا ، تیسری مرتبہ وزیر اعظم یا وزیر اعلیٰ بننے کی پابندی ختم کرنا، ایک درجن سے زیادہ وفاقی وزارتوں کے اختیارات صوبوں کو منتقل کرنا،  وزیر اعظم کو مشترکہ مفادات کونسل کا سربراہ مقرر  کرنا، اعلیٰ عدلیہ کے ججوں اور چیف الیکشن کمشنر کی تعیناتی کے طریقے متعارف کرنا وغیرہ شامل تھے ۔ 

اٹھارویں ترمیم کے بعد وفاقی حکومت کو حاصل ہونے والے محاصل کا بڑا حصہ (58 فیصد) صوبوں کو منتقل ہو جاتا ہے جبکہ باقی ماندہ 42 فیصد میں سے اسلام آباد نے دفاعی بجٹ، وفاقی حکومت کے انتظامی اخراجات اور اندرونی اور بیرونی قرضوں کی ادائیگی کرنا ہوتی ہے۔