آصف زرداری کی عمران خان کی قومی اداروں کیخلاف نفرت انگیز مہم کی مذمت 

تفصیلات کے مطابق سابق صدر اور شریک چئیرمین پی پی پی آصف زرداری نے اپنے ایک بیان میں عمران خان کی قومی اداروں کےخلاف مہم کی پر زور مذمت کرتے  ہوئے  کہا ہے کہ  احتساب سے بچنے کیلئے یہ عمران خان کی ایک بھونڈی کوشش ہے ۔ انہوں نے کہاکہ  اقتدار سے بے دخل ہونے کے بعد عمران ذہنی توازن کھو چکا ہے اور  وہ اب قومی اداروں پر حملہ آور ہو رہا ہے۔

ان کا کہنا تھا کہ  عمران خان کی ہرزہ سرائی کے پیچھے کرپشن کیس اور فارن فنڈنگ کیس کا خوف ہے، سزا سے بچنے کیلئے وہ قومی اداروں کو متنازع بنانے کی کوشش کر رہا ہے۔

سابق صدر کا کہنا تھا کہ اقتدار کے لالچ میں وہ جس نہج پر جارہا ہے وہ ملک کو پھر دولخت کرنے کی سازش لگتی ہے۔

آصف زرداری نے مزید کہا کہ جھوٹے سازشی بیانیے سے لوگوں کے جذبات بھڑکانے کی کوشش قابل مذمت ہے۔  عمران کا کرسی کیلئے نہ صرف ملک بلکہ قومی اداروں کا بھی نقصان کرنا برداشت نہیں کیاجائیگا ، عمران کی انہی حرکتوں سے پونے 4 سال میں ملک آگے کی بجائے پیچھے  چلا گیا ۔